Swivuriso 7 - BIBELE Mahungu Lamanene

Wansati wa mahanyelo layo biha

¹ N'wananga, yingisa leswi ndzi ku byelaka swona, u hlayisa switsundzuxo swa mina.

² Hlayisa switsundzuxo swa mina, u ta hanya, ni milawu ya mina, yi hlayise kukota ndzololo ya tihlo ra wena;

³ swi bohe etintihweni ta wena, u swi fihla emakorhweni ya mbilu ya wena.

⁴ Byela vutlhari, u ku: “Hi wena makwerhu!” Ku twisisa kona, ku vule “munghana wa wena”.

⁵ Swi ta ku ponisa eka wansati wa dlakuta, loyi a nga tshembekangiki, wa marito yo tsokombela.

⁶ Siku rin'wana ndzi hlometerile ehandle hi fasitere ra yindlu ya mina,

⁷ ndzi languta lavantshwa lavo pfumala vutivi, kutani exikarhi ka vona ndzi vona jaha leri nga ehleketiki swinene,

⁸ ri ri karhi ri famba egondzweni, ri jika, ri kongoma endlwini ya lowa wansati.

⁹ A ku ri nimadyambu, hi nkarhi wa mpimavayeni, loko ku ri karhi ku phuma, ni xinyami xi tshinela.

¹⁰ Hiloko wansati a ri hlanganisa a ambele ku fana ni nghwavava, mbilu ya yena yi tele vukanganyisi.

¹¹ Wansati loyi i wo tlatlarhuka wo pfumala xichavo, naswona a hi ricondzo ra yena!

¹² Etindleleni, hi yena; erivaleni a nga pfumaleki, emahandzeni ya magondzo, ú talela kona.

¹³ Kutani a khoma jaha leri a ri ntswontswa, a vulavula na rona a nga nyumi, a ku:

¹⁴ “A ndzi boheka ku humesa magandzelo, kutani namuntlha ndzi hetisile leswi ndzi tshembiseke swona.

¹⁵ Hikokwalaho ndzi sukeke ekaya, ndzi ta ku hlanganisa, ndzi ku lavile ngopfu, kutani sweswi ndzi ku kumile.

¹⁶ Ndzi andlalerile mubedo wa mina hi minceka ya mavalavala leyi lukiweke hi ntsembyani wa le Egipta;

¹⁷ ndzi wu n'wan'waserile mirhi yo nun'hwela ya tinxaka-xaka.

¹⁸ Tana, hi ya tiphina swin'we ri ko ri xa, a hi ye hi ya tikhorwisa hi rirhandzu.

¹⁹ Nuna wa mina a nga kona ekaya, ú ye kule swinene;

²⁰ ú fambile ni xinkwamana xa mali, ú ta vuya n'hweti leyi taka.”

²¹ Wansati a kucetela jaha hi marito ya yena yo kanganyisa, a ri koka hi ririmi ra yena ro tsokombela.

²² Kutani jaha ri hatla ri n'wi landzelela, ku fana ni homu leyi kokiwaka hi muhalo, kumbe mhala leyi tlulaka yi wela entlhan'wini,

²³ ku kondza nseve wu yi tlhava wu ya fika emarumbyini. Ri fana ni xinyanyana lexi phatsamaka evurimbeni, xi nga swi tivi leswaku xi ta lahlekeriwa hi vutomi.

²⁴ Hikokwalaho sweswi, ndzi yingiseni n'wina vana, rhiyani ndleve, mi twa leswi ndzi mi byelaka swona.

²⁵ Wansati loyi, a nga tshuki a mi yenga, mi nga tshuki mi lahleka mi n'wi landzelela,

²⁶ hikuva lavo tala, ú va petile nhloko, masirha lawa a ma vangeke i ntsandza-vahlayi.

²⁷ Yindlu ya yena i ndlela yo ya exivandleni xa vafi, yi rhelela yi kongoma etindlwini ta rifu.