Swivuriso 6 - BIBELE Mahungu Lamanene

U nga tibohi ku hakelela van'wana emilandzu!

¹ N'wananga, loko u tshuka u tibohile ku hakelela muakelani milandzu ya yena, ni loko u hlambanyele munhu un'wana ku n'wi hakelela swikweleti,

² u tiphasile hi ku vulavula ka wena, marito ya wena ma ku wisele entlhan'wini.

³ Hikokwalaho, loko u lava ku tiponisa, endla leswi n'wananga: Leswi u weleke emavokweni ya munhu loyi, hatlisa u ya kombela hi matimba eka yena leswaku a ku ntshunxa;

⁴ vurhongo a byi suke, u nga yi eku etleleni,

⁵ hatlisa u phonyoka, ku fana ni mhala leyi chupukelaka muhloti, ni nyanyana leyi tsemaka rigoda.

Yana u ya xiya vusokoti, we lolo!

⁶ Wena lolo, yana eka vusokoti, u xiyaxiya mahanyelo ya byona, u ta tlhariha.

⁷ A byi na hosi, ni murhangeri kumbe ndhuna byi hava,

⁸ kambe hi ximumu byi hlengeleta swakudya swa byona, byi tivekela timbuva enkarhini wa ntshovelo.

⁹ We lolo, xana u ta etlela ku fikela rini, u ta pfuka rini evurhongweni ke?

¹⁰ Wena u ri: “Ndza há kú bàà, ndzi etlelanyana switsongo, ndza ha khondlanyana mavoko, ndzi wisa.”

¹¹ Kasi hi loko vusiwana byi nghenile kukota xi-ta-xi-famba, ni vusweti ku fana ni xigevenga.

Chava munhu wa mavunwa!

¹² Munhu loyi a rhendzelekaka a ri karhi a hangalasa mavunwa, a nga pfuni nchumu, ú bihile.

¹³ Ú famba a ri karhi a tshunyeta-tshunyeta, a tsala-tsala hansi hi swikunwana, a khwenuta-khwenuta vanhu;

¹⁴ minkarhi hinkwayo, u le ku lukeni ka mano layo biha, a pfuxa madzolonga.

¹⁵ Hikokwalaho, ú ta wela hi khombo a nga ehleketanga, ú ta jumiwa a wiseriwa ehansi, a nga ha pfuki.

Leswi Xikwembu xi swi vengaka

¹⁶ Xana leswi HOSI Xikwembu xi swi vengaka i swilo swa 6 xana? E-e, leswi yilaka emahlweni ka xona i swilo swa 7, swi nga leswi:

¹⁷ Munhu loyi a tikurisaka, ni loyi a vulavulaka mavunwa, ni loyi a halataka ngati mahala,

¹⁸ ni munhu wa miehleketo yo homboloka, ni la tsutsumaka-tsutsumaka a endla leswo biha,

¹⁹ ni mbhoni leyi vulavulaka mavunwa ntsena, ni munhu la byalaka rivengo exikarhi ka vamakwavo.

Vuoswi bya dlayisa

²⁰ N'wananga, hlayisa switsundzuxo swa mina tata wa wena, ni milawu ya mana wa wena, u nga tshuki u hambana na yona;

²¹ swi hlayise embilwini ya wena swi tshama kona minkarhi hinkwayo, u swi boha enhan'wini ya wena.

²² Loko u ri eku fambeni, swi ta ku komba ndlela, swi ta ku sirhelela loko u etlele, loko u pfuka, swi ta vulavula na wena.

²³ Switsundzuxo i rivoni, milawu i ku vonakala, marito yo tshinya ni ku laya ma komba ndlela ya ku hanya.

²⁴ Hi swona swi nga ta ku sirhelela eka wansati wo biha mbilu, loyi a nga tshembekangiki, wa ririmi ro tsokombela.

²⁵ U nga tshuki u navela ku saseka ka yena, ni ku copeta-copeta ka yena ku nga tshuki ku ku yenga.

²⁶ Munhu a nga hakela nghwavava hi xinkwa xin'we ntsena, kambe wansati la nga ni nuna ú lava rifuwo ra wena hinkwaro.

²⁷ Loko munhu a okela ndzilo exikhwameni, swiambalo swa yena swi ta tshwa!

²⁸ Loyi a kandziyaka makala ya ndzilo, ú ta duvuka minkondzo.

²⁹ Swi tano ni le ka munhu loyi a etlelaka ni nsati wa un'wana; un'wana ni un'wana loyi a khumbaka nsati wa muakelani, a nge poni.

³⁰ Khamba leri ri yivaka swakudya, leswaku ri ta miyeta nyoka, vanhu a va ri soli,

³¹ kambe loko ri tshuka ri kumiwile, ri ta riha ka 7, ri humesa swilo hinkwaswo swa muti wa rona.

³² Wanuna loyi a oswaka, a nga ehleketi! Loko a etlela ni nsati wa un'wana, ú ticelela sirha;

³³ ú ta boxiwa timbanga, a pfumala ni ndzhuti, a ku nga vi na loyi a nga ta n'wi susa tingana,

³⁴ hikuva loyi a nga ni rilaveta eka nsati wa yena, wa pfurha hi vukari, kutani siku a rihiselaka, a nge tsetseleli.

³⁵ A nga ka a nga pfumeli ku riheriwa; mbilu ya yena yi nga ka yi nga wi, hambiloko a nyikiwa tinyiko to tala!