Swivuriso 5 - BIBELE Mahungu Lamanene

Chava vuoswi!

¹ N'wananga, rhiya ndleve u twa swa vutlhari bya mina, yingisa hilaha mina ndzi twisisaka hakona;

² loko u endla tano, u ta va ni mianakanyo leyinene, enon'wini wa wena, vutivi byi ta hlayiseka.

³ Milomu ya wansati wa dlakuta yi tenga-tenga vulombe, ririmi ra yena ri rhetela kukota mafurha,

⁴ kambe eku heteleleni, wa bava ku fana ni xibaha, wa kariha kukota mukwana wa xinyayi.

⁵ Minkondzo ya yena ya dlayisa, mahanyelo ya yena ma yisa exivandleni xa vafi.

⁶ Ndlela leyi yisaka evuton'wini, a nga na mhaka na yona, tindlela ta yena a ti fikisi helo, kambe yena n'winyi a nga swi voni.

⁷ N'wina vana, ndzi yingiseni, namarhelani leswi ndzi mi byelaka swona.

⁸ Fambela kule ni wansati loyi wa dlakuta, u nga tshuki u nghena emutini wa yena,

⁹ hikuva u nga pfumala ndzhuti emahlweni ka vanhu, ni munhu wa nsele a nga ku dlaya,

¹⁰ kutani vanhu vambe va nga kuma rifuwo ra wena, ku tikarhata ka wena ku fumisa van'wana.

¹¹ Loko masiku ya wena ma ri karhi ma hela, ni loko miri wa wena wu hlakele, u ta konya,

¹² u ku: “Loko ingi ndzi lo pfumela ku layiwa, ndzi nga alanga ku tshinyiwa!

¹³ A ndzi yingisanga, leswi vadyondzisi va mina va ndzi byeleke swona, a ndzi rhiyanga ndleve ndzi yingisa valeteri va mina.

¹⁴ Ndzi lavile ku wela ekhombyeni lerikulu, ntshungu lowu hlengeletaneke wu ri karhi wu swi vona.”

Rhandza nsati wa wena!

¹⁵ Nsati wa wena i xihlovo xa mati lawa yo tenga, timula torha ra wena exihlobyeni xexo!

¹⁶ U nga tshiki mati ya kona ma khulukela ehandle, u nga pfumeli leswaku ma halateriwa erivaleni.

¹⁷ Mati lawa a ma ve ya wena ntsena, u nga siyerisani ni vaakelani va wena.

¹⁸ Tiphine hi nsati loyi u n'wi tekeke loko wa ha ri jaha, tsakisa yena a nga xihlovo xa wena.

¹⁹ Nsati wa wena i ximhuntana xo saseka, vumbhurhi bya yena i bya mhala; mavele ya yena a ma ku nyike ntsako wo hetiseka minkarhi hinkwayo, rirhandzu ra yena a ri ku yive mbilu masiku hinkwawo.

²⁰ N'wananga, hikwalaho ka yini u yiviwa mbilu hi wansati wa dlakuta, xana? U n'wi vukarhela yini xana?

²¹ Tsundzuka leswaku HOSI Xikwembu xi languta mikhuva ya vanhu hinkwavo, xi kambisisa mintirho ya vona hinkwayo.

²² Milandzu ya munhu wo biha yi dlayisa yena n'winyi, ú phasiwa hi ntlhamu wa swidyoho swakwe,

²³ wa fa hi leswi a aleke ku layiwa, vuphukuphuku bya yena lebyikulu bya n'wi lovisa.