Swivuriso 4 - BIBELE Mahungu Lamanene

Vutlhari bya hlayisa

¹ N'wina vana, rhiyani tindleve, mi yingisa swiletelo swa tata wa n'wina, leswaku mi ta tlhariha,

² hikuva mina ndzi mi komba mikhuva leyinene; mi nga tshuki mi hambana ni milawu ya mina.

³ Loko ndza ha ri emavokweni ya tatana, ndzi ri n'wana yexe, la rhandziwaka hi manana,

⁴ tatana ú ndzi dyondzisile, a ku: “N'wananga, namarhela leswi ndzi ku byelaka swona, u hlayisa milawu ya mina embilwini ya wena, kutani u ta hanya.

⁵ Tilavele vutlhari ni ku twisisa; leswi ndzi ku byeleka swona, u nga tshuki u swi rivala, kumbe ku swi fularhela.

⁶ Namarhela vutlhari, byi ta ku hlayisa; byi rhandze, byi ta ku sirhelela.

⁷ Xilo xo sungula i vutlhari: Tilavele byona, u tilavela ni ku twisisa, hambiloko swi ku tekela swilo swa wena hinkwaswo.

⁸ Kurisa vutlhari, byi ta ku kurisa, byi ta ku dzunisa, loko u byi vukarha.

⁹ Vutlhari byi ta ku tlhandleka harhi yo saseka enhlokweni, byi ku ambexa ni xidlodlo xo vangama.”

Hambana ni vanhu vo homboloka!

¹⁰ N'wananga, yingisa u amukela leswi ndzi ku byelaka swona, leswaku u ta hanya masiku layo tala.

¹¹ Budula ra vutlhari, ndzi ku kombile, ndzi ku fambisile etindleleni leto lulama.

¹² Loko u famba, u nga ka u nga khuguriwi, ni loko u tsutsuma, u nga ka u nga wi.

¹³ Hlayisa swiletelo, u nga swi tshiki; swi sirhelele, hikuva hi byona vutomi bya wena.

¹⁴ U nga tshuki u landzelela lavo homboloka, ni mikhuva ya lavo biha, u nga yi tekeleli.

¹⁵ Fambela kule na swona, u nga tshineli ni le kusuhi, swi papalate, u hundzela emahlweni.

¹⁶ Lavo homboloka a va etleli loko va nga si endla swo biha, loko va nga si vavisa munhu, vurhongo a byi ti.

¹⁷ Vubihi i swakudya swa vona, vhinyo leyi va nwaka yona i tihanyi.

¹⁸ Mahanyelo ya lavo lulama ma fana ni ku vonakala ka vurhonga loku ku yaka ku engeteleleka, dyambu ri ko ri xa.

¹⁹ Kambe mahanyelo ya lavo homboloka i xinyami lexikulu, ni leswi swi va khugulaka, a va swi tivi!

Hlayisa mbilu ya wena!

²⁰ N'wananga, rhiya ndleve u twa marito ya mina, yingisa leswi ndzi ku byelaka swona,

²¹ u nga swi tshiki swi wela ehansi, swi hlayise embilini ya wena,

²² hikuva i vutomi eka loyi a swi kumaka, swi horisa miri wa yena hinkwawo.

²³ Hlayisa mbilu ya wena ku tlula swilo hinkwaswo, hikuva hi xona xihlovo xa vutomi.

²⁴ U nga tshuki u vulavula swo homboloka, papalata ni marito ya vuxisi.

²⁵ Wena languta emahlweni ntsena, u nga tshuki u halahala ematlhelo.

²⁶ Xiyaxiya laha u kandziyaka kona, kutani riendzo ra wena hinkwaro ri ta va lerinene;

²⁷ u nga tshuki u hambukela exineneni kumbe eximatsini, leswo biha, u nga ngheni eka swona!