Swivuriso 31 - BIBELE Mahungu Lamanene

Switsundzuxo eka tihosi

¹ Marito lawa Lemuwele hosi ya le Masa a byeleke hi mana wa yena, hi lawa:

² N'wananga, ndzi vula wena ndzi ku velekeke, wena nhlamulo ya ku tiboha ka mina, xana ndzi nga ku byela yini xana?

³ U nga tshuki u tinyiketa eka vavasati, u nga va landzeleli, hikuva va wisa ni tihosi.

⁴ We Lemuwele, a hi swa tihosi ku nwa vhinyo, ndzi ri, a hi swa tihosi, hambi varhangeri, a va fanelanga ku navela byalwa,

⁵ hikuva loko va nwa, va ta rivala milawu, kutani va tekela vapfumari hinkwavo etifanelo ta vona.

⁶ Byalwa, nyika munhu loyi a nga kusuhi ni ku fa, ni lava khunguvanyekeke ngopfu emoyeni, va nyike vhinyo,

⁷ va ta nwa, va rivala vusiwana bya vona, maxangu ya vona a va nga ha ma tsundzuki.

⁸ Vanhu lava nga kotiki ku vulavula hi voxe, va vulavulele, u sirhelela vapfumari hinkwavo, lava tekeriwaka tifanelo ta vona.

⁹ Vulavula, u avanyisa hi nawu; tifanelo ta swisiwana ni vapfumari, ti hlayise.

Ta wansati wa migingiriko

¹⁰ Wansati wa migingiriko, a swi olovi ku n'wi kuma, swilo swo bomba ha swona, ú swi tlula kule.

¹¹ Nuna wa yena wa n'wi tshemba swinene, hikuva wansati loyi, ú gingirikela muti wa yena.

¹² Masiku hinkwawo, ú endlela nuna wa yena leswinene, a nga n'wi onheli nchumu.

¹³ Ú tilavela voya bya tinyimpfu ni ntsembyani, a tilukela swona a tsakile.

¹⁴ Ú fana ni tingalava ta van'wamabindzu, ú ya kule a ya singilela ndyangu wa yena.

¹⁵ Ú pfuka ka ha ri mpundzu swinene, a lulamisela va muti wa yena eswakudya, malandza ya yena ya xisati, a ma avela ni ntirho.

¹⁶ Ú xiyaxiya nsimu, kutani a yi xava; hi mali leyi a yi bindzuleke, ú rima nsimu ya vhinya.

¹⁷ Ú yima hi milenge a titirhela, a nga tshami hi mavoko.

¹⁸ Loko a vona leswaku mintirho ya yena ya n'wi vuyerisa, ú tirha vusiku ni nhlekanhi, a nga etleli.

¹⁹ Ú tiswulela tingoti ta ntsembyani, a tilukela ni swiambalo swa voya bya tinyimpfu.

²⁰ Swisiwana, a nga swi tsoni nchumu, ú pfuna ni vapfumari.

²¹ A nga chavi loko a vona gamboko ri wa, hikuva vandyangu wa yena hinkwavo va ambele swo kufumela.

²² Ú tiendlela minkumba hi yexe, a tirhungela swiambalo swa xivunguvungu ni swa ntsembyani wo saseka.

²³ Nuna wa yena wa xiximiwa ehubyeni, laha a kanelaka kona timhaka ni vakulukumba va tiko.

²⁴ Wansati loyi ú rhunga minceka, a tixavisela yona, a luka ni mavamba, a xavisela van'wamabindzu.

²⁵ Xiambalo xa yena xa xiviri, i ntamu ni ndzhuti; loko a anakanya nkarhi lowu taka, a nga chavi nchumu.

²⁶ Ú vulavula swa vutlhari ntsena, a letela van'wana hi moya wa tintswalo.

²⁷ Ú lavisisa tindlela to hlayisa ndyangu, swakudya swo kombela, a nga dyi.

²⁸ Vana va yena va n'wi tlangela erivaleni, na yena nuna wa yena wa n'wi dzunisa, a ku:

²⁹ “Vavasati lava gingirikaka, va tele, kambe na un'we, a nga fiki eka wena.”

³⁰ Ku saseka ka nghohe ka kanganyisa, ni vumbhurhi bya hela, kambe wansati loyi a chavaka HOSI Xikwembu, wa dzuneka.

³¹ Wansati loyi, a a nyikiwe mihandzu ya ntirho wa yena; swiendlo swa yena a swi n'wi dzunise ehubyeni!