Swivuriso 30 - BIBELE Mahungu Lamanene

Marito ya Aguri

¹ Lawa i marito ya Aguri n'wana Yake, wa le Masa, lawa a ma byeleke Itiele na Ukala.

² Hakunene ndzi phuphula mina, a ndzi munhu wa nchumu, ku twisisa loku van'wana va nga na kona, mina ndzi hava.

³ Vutlhari a ndzi byi dyondzanga, ni timhaka ta Xikwembu, a ndzi ti tivi.

⁴ I mani la nga tlhandlukela etilweni, a tlhela a vuya xana? Xana i mani la nga tshama a fumbarhela moya xana; la tshamaka a phutsela mati hi nceka i mani xana, i mani la nga veka vugimamusi bya misava xana? Vito ra yena hi yena mani, ni n'wana wa yena i mani xana? Wena u fanele ku swi tiva!

⁵ Hinkwaswo leswi vuriwaka hi Xikwembu swi tiyile, hi xona xitlhangu xa lava tsutsumelaka eka xona.

⁶ U nga engeteli nchumu eka marito ya xona, leswaku xi ta ka xi nga ku bi, na wena u nga hundzuki muhembi.

⁷ Ndzi kombela ku nyikiwa swilo leswimbirhi, ndzi nga si fa, u nga tshuki u ndzi alela swona:

⁸ Vuxisi ni mavunwa, ndzi hambanyise na swona; vusiwana hambi rifuwo, u nga ndzi nyiki, ndzi phamele ntsena swakudya leswi swi ndzi ringanaka,

⁹ hikuva loko ndzi xurha ngopfu, ndzi nga tshuka ndzi ku landzula, ndzi ku: “HOSI Xikwembu xa kona, i mani ke?” Kumbe loko ndzi wela evusiwaneni, ndzi sungula ku yiva, kutani ndzi onha vito ra wena, we Xikwembu xanga.

¹⁰ Hlonga, u nga tshuki u ri onha vito eka n'wini wa rona, hikuva ri nga ku rhuketela, kutani u wela enandzwini.

¹¹ Ku ni vanhu lava rhuketelaka vatata wa vona, hambi vamana wa vona, a va va xiximi.

¹² Ku ni vanhu lava tivonaka va tengile, kasi va lo pyì, hi thyaka!

¹³ Ku ni vanhu lava tikurisaka ngopfu, lava tshamaka va ri karhi va tivamba-vamba.

¹⁴ Ku ni vanhu lava meno ya vona ma nga timbatlu kumbe mikwana: Ha wona va herisa swisiwana laha misaveni, va susa ni vapfumeri evanhwini.

¹⁵ Xigalana xi ni vana vambirhi va xisati, lava va nge: “Hi nyike! Hi nyike!” Xana swilo leswi nga kotiki ku vula swi ku: “I nkomu, ndzi xurhile!” i swinharhu xana? E-e, i mune, swi nga leswi:

¹⁶ I xivandla xa vafi, ni nsati wa mhika, ni misava yo oma leyi lavaka mpfula, ni ndzilo lowu tipfurhelaka hi ku rhandza.

¹⁷ Munhu loyi a sandzaka tata wa yena, a tlhela a ala ku yingisa mana wa yena, ú ta xokoriwa mahlo hi mawukuwuku, a dyiwa hi makoti.

¹⁸ Swilo leswi swi ndzi hlamarisaka, leswi ndzi nga kotiki ku swi twisisa, i swinharhu xana? E-e, i mune, swi nga leswi:

¹⁹ I ndlela leyi koti ri hahaka ha yona empfhukeni, ni leyi nyoka yi kokovaka ha yona emaribyeni, ni leyi ngalava yi fambaka ha yona elwandle, ni leyi jaha ni nhwana va rhandzanaka ha yona.

²⁰ Wansati la oswaka, ú endlisa leswi: Ú dya a tlhela a tisula nomo, kutani a ku: “Mina, a ndzi endlanga nchumu xo biha.”

²¹ Xana swilo leswi tsekatsekisaka tiko, leswi ri nga kotiki ku swi tiyisela, i swinharhu xana? E-e, i mune, swi nga leswi:

²² Hiloko hlonga ri hundzuka hosi, ni loko xiphukuphuku xi dya xi xurha,

²³ ni loko wansati wo ka a nga rhandzeki a kuma vukati, ni loko nandza wa xisati a teka ndhawu ya nkosikazi.

²⁴ Swivumbiwa swa mune leswitsongo swa laha misaveni leswi tlhariheke ngopfu, hi leswi:

²⁵ I vusokoti lebyi nga tiyangiki, kambe hi ximumu byi tihlengeletela swakudya;

²⁶ i timbila leti nga riki na matimba, kambe ti tilavela vutshamo emabakweni ya maribye;

²⁷ i tinjiya leti nga riki na hosi, hambiswiritano, ti famba hi mintlawa-ntlawa ya tona;

²⁸ i nkolombyani lowu u nga wu tamelaka evokweni, hambiswiritano, wa kumeka ni le tindlwini ta tihosi.

²⁹ Xana swilo leswi mafambele ya swona ma tsakisaka, i swinharhu xana? E-e, i mune, swi nga leswi:

³⁰ I nghala leyi tiyeke ku tlula swiharhi hinkwaswo, leyi nga chaviki nchumu;

³¹ i nkuku lowu tiololaka; i mbuti ya xiphongho; i hosi leyi nga kanetiwiki hi munhu etikweni.

³² Loko u tiendlile phuphula hi ku tikurisa, kumbe hi ku boha makungu layo biha, dyondza ku tikhoma u miyela.

³³ Phehlwa ri huma entswambeni lowu hlutiweke, nhompfu leyi biweke yi huma ngati, ku ntlhontlha vukari, swi pfuxa madzolonga.