Swivuriso 3 - BIBELE Mahungu Lamanene

Ku yingisa, swa vuyerisa

¹ N'wananga, u nga rivali leswi ndzi ku dyondzisaka swona. Hlayisa milawu ya mina,

² swi ta ku engetelela masiku ya ku hanya, swi ta ku nyika ku rhula evuton'wini bya wena.

³ Namarhela tintswalo ni ku tshembeka; swi bohelele enhan'wini, u swi fihla endzeni ka mbilu ya wena.

⁴ Hi ndlela leyi, Xikwembu xi ta ku tsakela, ni vanhu va ta ku xixima.

⁵ Tshemba HOSI Xikwembu hi mbilu ya wena hinkwayo, u nga tshembi ntsena vutlhari bya wena.

⁶ Eka hinkwaswo leswi u swi endlaka, tsundzuka HOSI Xikwembu, xi ta ku basisela tindlela.

⁷ U nga tshuki u tiendla ntlhari, chava HOSI Xikwembu, u hambana ni leswo biha.

⁸ Leswi, swi ta horisa miri wa wena, swi tiyisa ni marhambu ya wena.

⁹ Nkhensa HOSI Xikwembu hi leswi u nga na swona, u xi humesela ni leswi u nga ta rhanga u swi tshovela emasin'wini hinkwawo ya wena,

¹⁰ kutani switlati swa wena swi ta tlhemuka hi mavele, ni vhinyo yi ta tala yi khapa emakhuwaneni.

¹¹ N'wananga, loko HOSI Xikwembu xi ku laya, u nga soli, ni loko xi ku tshinya, u nga vi ni ximbilwa-mbilwana,

¹² hikuva HOSI Xikwembu xi tshinya loyi xi n'wi rhandzaka, xi ba loyi xi n'wi tsakelaka.

La tlhariheke, ú katekile

¹³ Munhu loyi a kumeke vutlhari ni ku twisisa, ú katekile,

¹⁴ hikuva vutlhari byi hakela ku tlula silivhere, byi vuyerisa ku tlula nsuku.

¹⁵ Vutlhari byi ni nkoka ku tlula swilo swo bomba ha swona, byi tlula ni swilo hinkwaswo leswi munhu a swi navelaka.

¹⁶ Hi byona lebyi nyikaka munhu masiku layo tala ya ku hanya, byi nyika rifuwo ni ku dzuneka.

¹⁷ Tindlela ta byona ta tsakisa swinene, mabudula ya byona i ku rhula ntsena.

¹⁸ Vutlhari i murhi lowu nyikaka vutomi eka lava va byi kumaka; lava va byi namarhelaka, va katekile!

¹⁹ Hi vutlhari, HOSI Xikwembu xi tumbuluxile misava, matilo xi ma endlile hi vutivi;

²⁰ vutivi bya xona byi handzurile misava, mati ya swidziva ma huma, byi endlile leswaku mapapa ma tshonisa mberha.

²¹ N'wananga, hlayisa vutivi lebyinene ni mianakanyo leyinene, swilo leswi, u nga tshuki u hambana na swona;

²² hi swona swi nga ta ku hanyisa, swi sasekisa vutomi bya wena;

²³ kutani tindlela ti ta ku basela, a ku nga vi na nchumu lexi nga ta ku khugula.

²⁴ Loko u etlele, a ku nga vi na lexi xi nga ta ku chavisa, ni vurhongo byi ta nandziha;

²⁵ loko ku tshuka ku humelela leswo chavisa, u nga tsemeki nhlana, ni loko lavo homboloka va ku tela ku fana ni xidzedze, u nga chavi,

²⁶ hikuva HOSI Xikwembu hi xona xi nga ta ku tiyisa, xi nga ka xi nga ku tshiki u wela ekhombyeni.

Rhandza munhu-kuloni

²⁷ Loko u ri ni matimba yo lawula swilo leswinene, u nga tshuki u tsona vanhu lava nga ni tifanelo ta ku swi kuma.

²⁸ U nga byeli munhu-kuloni, u ku: “Famba, u ta tlhela u vuya mundzuku, ndzi ta ku nyika swona”, kasi swilo swa kona, u na swona.

²⁹ Munhu-kuloni loyi a akelaneke na wena hi ku ku tshemba, u nga tshuki u n'wi tshama xikungu.

³⁰ Loko munhu a nga ku hoxelanga, u nga tshuki u holova na yena.

³¹ U nga tshuki u navela munhu wa tinyimpi, ni mikhuva ya yena, u nga yi tekeleli,

³² hikuva HOSI Xikwembu xi venga munhu lowo homboloka, kasi lavo lulama, xi twanana na vona.

³³ HOSI Xikwembu xi vanga makhombo endlwini ya lowo homboloka, kambe emitini ya lavo lulama, xi nghenisa minkateko;

³⁴ lava sandzaka, xa va sandza, kambe xi tsakela lava titsongahataka.

³⁵ Ku dzunisiwa i swa lavo tlhariha, tingana i ta swiphunta.