Swivuriso 29 - BIBELE Mahungu Lamanene

¹ La tshinyiwaka, kambe a ala a tiomisa nhloko, ú ta wa a tshoveka a nga ehleketanga, kutani a nge he tshunguleki.

² Loko lowo lulama a vekiwa ku va hosi, vanhu va tsaka, kasi loko ku vekiwa lowo homboloka, va gungula.

³ N'wana la rhandzaka vutlhari, ú tsakisa tata wa yena, kasi loyi a twananaka ni tinghwavava, ú hangalasa xuma xa yena.

⁴ Hi ku landzelela milawu leyinene, hosi yi tiyisa tiko ra yona, kambe loko yi tsakela mali ntsena, ya ri lovisa.

⁵ Munhu loyi a chavaka ku tshinya muakelani, ú n'wi rhiyela ntlhamu lowu wu nga ta n'wi phasa.

⁶ Munhu wo biha mbilu, ú wela entlhan'wini wa swidyoho swa yena, kasi lowo lulama, wo tiyimbelelela a tsakile.

⁷ Munhu wo lulama ú tiva tifanelo ta swisiwana, kambe munhu wo homboloka yena, vutivi lebyo tano, a nga na byona.

⁸ Vasandzi va pfurhisa ndzilo wa madzolonga emutini, kasi lavo tlhariha va rheleta vukari.

⁹ Loko munhu wo tlhariha a tengisana ni xiphukuphuku, xona xo ba huwa xi tlhela xi hleka, mhaka yi nga heli.

¹⁰ Lava tsakelaka ku halata ngati, va venga munhu wo tshembeka, kasi lavo lulama va tsakela ku n'wi sirhelela.

¹¹ Xiphunta xi hatla xi komba ku khunguvanyeka ka xona, kambe munhu wo tlhariha wa tiyisela, ú kota ku tikhoma.

¹² Mufumi loyi a yingiselaka mavunwa, vatsundzuxi va yena hinkwavo va ta hundzuka vahembi.

¹³ Xisiwana ni muxanisi wa xona, va hlangana eka xilo xin'we: Hinkwavo va hanyisiwa hi HOSI Xikwembu.

¹⁴ Hosi leyi avanyisaka xisiwana hi ku lulama, vuhosi bya yona byi ta tshama hilaha ku nga heriki.

¹⁵ Nkhavi ni ku tshinyiwa, swa tlharihisa; n'wana la kulaka a nga layiwi, ú ta khomisa mana wa yena tingana.

¹⁶ Vubihi bya engeteleka etikweni loko lowo homboloka a vekiwa ku va hosi, kambe lavo lulama va ta hlalela ku wa ka yena.

¹⁷ Loko u tshinya n'wana wa wena, ú ta ku nyika ku rhula, a phyuphyisa moya wa wena.

¹⁸ Vanhu lava nga kumiki switsundzuxo swa HOSI Xikwembu, va ta tshika milawu; ku katekile lava hlayisaka nawu wa HOSI Xikwembu.

¹⁹ Ku tshinya hlonga hi marito ntsena, a swi pfuni nchumu, ri nga ma twa, kambe a ri nga ma yisi enhlokweni.

²⁰ Xiphunta xa antswa, ku ri na munhu wo tsutsumela ku hlamula timhaka.

²¹ Loyi a bambatelaka hlonga ra yena ku sukela vuhlangini bya rona, eku heteleleni, a nga hlamali loko ri hundzuka mudyandzhaka.

²² Munhu wa ximbilwa-mbilwana, ú vanga madzolonga, ni munhu wo hatla ku kariha, ú pfuxa timholovo.

²³ Ku tikukumuxa, swi vangela ku wa, kasi munhu wo titsongahata, ú ta dzunisiwa.

²⁴ Munghana wa khamba, ú venga vutomi bya yena n'winyi: Ku rhuketeriwa, wa swi twa, kambe a nga ha swi koti ku vula ntiyiso.

²⁵ Ku chava munhu i ku tirhiyela ntlhamu, kambe loyi a tshembaka HOSI Xikwembu, ú hlayisekile.

²⁶ Vanhu vo tala va lava ku tsakeriwa hi tihosi, kambe i HOSI Xikwembu ntsena lexi avanyiselaka munhu timhaka ta yena.

²⁷ Munhu wo lulama ú venga lowo homboloka, kasi na yena munhu wa mahanyelo lamanene, ú vengiwa hi lavo homboloka.