Swivuriso 28 - BIBELE Mahungu Lamanene

¹ Lowo homboloka, ú tsutsuma hambiloko a nga hlongorisiwi hi munhu, kasi lavo lulama, a va chavi nchumu, va fana ni nghala.

² Loko ku tshuka ku humelela mpfilumpfilu etikweni, lava lavaka vurhangeri, va tele, kambe loko ku ri ni un'we wo tlhariha la nga ni miehleketo, tiko ri ta kuma ku rhula nkarhi wo leha.

³ Xisiwana xa mulanguteri, lexi xanisaka swisiwana-kulobye, xi fana ni mpfula ya ximbhembhe, leyi herisaka swakudya.

⁴ Loko u tlula nawu, u dzunisa lavo homboloka, kasi loko u wu hlayisa, a wu yimi na vona.

⁵ Vanhu vo biha timbilu, a va tivi leswi lulameke, kambe lava gandzelaka HOSI Xikwembu, va swi tiva swinene.

⁶ Xisiwana lexi hanyaka hi ku tshembeka, xi tlula n'wankumi loyi a nga ni mikhuva yo biha.

⁷ N'wana la hlayisaka nawu, ú tlharihile, kasi loyi a tolovelaneke ni lava makolo, ú khomisa tata wa yena tingana.

⁸ Munhu loyi a engetelelaka rifuwo ra yena hi ku lava ntswalo wa mali leyi a yi lombiseke, rifuwo rero, ú ri hlengeletela loyi a nga ni tintswalo eka swisiwana.

⁹ Loyi a pfalaka tindleve, a nga lavi ku twa nchumu hi nawu, HOSI Xikwembu na xona, a xi nga twi swikhongelo swa yena.

¹⁰ Munhu loyi a kucetelaka lavo lulama ku endla leswo biha, ú tivangela khombo. Vanhu lava nga riki na xisandzu, vona va ta dya ndzhaka ya leswinene.

¹¹ N'wankumi a nga tivona a tlharihile, kambe xisiwana xi ta swi vona leswaku munhu loyi a nga tlharihanga.

¹² Loko lowo lulama a vekiwa ku va hosi, nkhuvo wa kona wu tsakisa ngopfu, kasi loko ku vekiwa lowo homboloka, vanhu va suka va ya tumbela.

¹³ Loyi a fihlaka swidyoho swa yena, a nge humeleli, kasi loyi a swi vulaka, kutani a hambana na swona, ú ta kuma tintswalo.

¹⁴ Ku katekile munhu loyi a chavaka HOSI Xikwembu minkarhi hinkwayo; kambe loyi a tinonon'hwisaka, ú ta wela ekhombyeni.

¹⁵ Munhu wo homboloka la fumaka tiko ra swisiwana, ú chavisa kukota nghala leyi bongaka kumbe xinkankanka lexi mpfhumpfhaka.

¹⁶ Murhangeri wo pfumala ku twisisa, ú andzisa maxangu, kasi loyi a alaka ku xaviwa, ú andzisa masiku ya yena ya ku hanya.

¹⁷ Loyi a tirhwexeke nandzu hi ku dlaya un'wana, ú ta tshamela ku baleka a kondza a fa, ku nga vi na loyi a n'wi pfunaka!

¹⁸ Munhu loyi a tshembekeke endleleni ya yena, ú ta hlayiseka, kasi loyi a lavaka ku famba hi tindlela timbirhi hi nkarhi wun'we, ú ta hatla a wa.

¹⁹ Munhu loyi a rimaka, ú ta dya a xurha, kambe loyi a landzelelaka leswi nga pfuniki nchumu, ú ta va xisiwana lexikulu.

²⁰ Loyi a tshembekaka, ú ta kateka ngopfu, kambe loyi a lavaka ku fuma hi siku rin'we, a nge poni, ú ta biwa.

²¹ Ku ya hi nghohe, kumbe ku hambukisa timhaka, hi mhaka ya ku xaviwa hi swakudyanyana, a swi sasekanga.

²² Munhu wo tsonana, ú tsutsumela rifuwo, kambe a nga swi tivi leswaku vusiwana byi n'wi kongomile.

²³ Loyi a nga chaviki ku tshinya van'wana, eku heteleleni, ku ta tsakeriwa yena ku tlula munhu wa marito yo tsokombela.

²⁴ N'wana la tekelaka vatswari va yena swilo swa vona, kutani a ku: “Sweswo a hi xidyoho!” i munghana wa swigevenga.

²⁵ La nga ni makolo, ú vanga madzolonga, kasi munhu loyi a tshembaka HOSI Xikwembu, ú ta dya a xurha.

²⁶ Loyi a titshembaka ngopfu, i xiphunta, kasi loyi a fambaka evutlharini, yena ú ta pona.

²⁷ La nyikaka swisiwana, a nge pfumali swa le mandleni, kambe la alaka ku swi pfuna, vanhu va ta n'wi rhuketela ngopfu.

²⁸ Loko lowo homboloka a vekiwa ku va hosi, vanhu va suka va ya tumbela, kambe loko a lova, lavo lulama va tlhela va engeteleleka.