Swivuriso 27 - BIBELE Mahungu Lamanene

¹ U nga tshuki u tidzunisa hi leswi nga ta humelela mundzuku, hikuva a wu tivi leswaku siku ra kona ri ta ta na yini.

² A ku ve vanhu van'wana va ku dzunisaka, u nga tidzunisi hi wexe, a ku vule van'wana, ku nga ri wena n'winyi.

³ Maribye ni sava, a hi ku tika ka swona, kambe ku pfukeriwa hi xiphukuphuku, swi tika ku tlula sweswo.

⁴ Ku kariheriwa ni ku hlundzukeriwa ngopfu, swa vava; kambe ku vondzokiwa, swi nga tiyela hi mani xana?

⁵ Munhu loyi a nga chaviki ku ku tshinya, ú tlula loyi a ku rhandzaka kambe a nga ku tsundzuxi.

⁶ Ku boxiwa timbanga hi loyi a nga munghana, swa antswa, ku ri ni ku ntswontswiwa hi nala wa wena.

⁷ Loyi a xurheke, ú nyenya ni vulombe, kasi loyi a nga ni ndlala, hambi swakudya leswi bavaka, swa n'wi nandzihela.

⁸ Munhu loyi a tshikaka muti wa yena, ú fana ni xinyanyana lexi tshikaka xisaka xa xona.

⁹ Mafurha ni mirhi ya risuna, a hi ku tsakisa ka swona, swi tano ni switsundzuxo leswi humaka embilwini ya munghana wa wena.

¹⁰ Vanghana va wena ni vanghana va tata wa wena, u nga va tshiki; u nga tikarhati hi ku ya emutini wa makwenu hi siku ra khombo, hikuva makwenu la nga kule, ú tlula hi munhu loyi u vandzakaneke na yena.

¹¹ N'wananga, loko wo tlhariha, mbilu ya mina yi ta tsaka, lava va ndzi hlekaka, ndzi ta va pfala nomo.

¹² Munhu la twisisaka, ú vona khombo ra ha ri kule kutani a tumbela, kasi lowo-ke-mano, ú tihoxa eka rona, kutani endzhaku a tilaya.

¹³ Loko munhu a tiboha ku hakela milandzu ya loyi a nga n'wi tiviki, a a tekeriwe xiambalo; loko a tshembisa ku hakelela vanhu vambe eswikweleti, a a humese xo khomela ha xona.

¹⁴ Ku vindzuka, u ya xeweta muakelani u ri karhi u ba huwa, swi fana ni loko u n'wi rhuketela.

¹⁵ Ku va ni nsati wo kariha, swi fana ni ku tshama endlwini yo pfuta ngopfu loko mpfula yi na;

¹⁶ ku miyeta yena, swi fana ni ku miyeta moya, kumbe ku fumbarhela mafurha!

¹⁷ Nsimbhi yi lota nsimbhi, na yena munhu, ú tlharihisa hi van'wana.

¹⁸ Loyi a hlayisaka nkuwa wa yena, ú ta dya mihandzu ya wona; swi tano ni loyi a hlayisaka n'wini wa yena, ú ta nkhensiwa.

¹⁹ Munhu la langutaka embilwini ya yena, wa titiva leswaku hi yena mani, ku fana ni xikandza lexi tivonaka ematini.

²⁰ Xivandla xa vafi ehansi ka misava a xi xurhi, mahlo ya munhu na wona a ma kolwi.

²¹ Nsuku ni silivhere swi kamberiwa hi ndzilo, munhu ú kamberiwa hi ku duma ka yena.

²² Xiphukuphuku, hambi u nga xi kandza ni mavele etshurini, a xi nga pfuki xi hambane ni vuphukuphuku bya xona.

²³ Tikarhatele ku tiva mintlhambi ya swifuwo swa wena, leswitsongo ni leswikulu, u swi hlayisa swinene,

²⁴ hikuva mali ya hela, na xona xuma, a xi tshami hilaha ku nga heriki;

²⁵ loko byanyi byi herile, kutani byin'wana byi ri karhi byi hluka, yisa swifuwo swi ya dya entshaveni;

²⁶ tinyimpfu ti nga ku ambexa, hambi yi ri nsimu, u nga yi kuma hi ku xavisa timbuti;

²⁷ ntswamba wa timbuti, mi ta dya mi siya, wena ni ndyangu wa wena, ku tlhela ku va ni wo hlayisa malandza ya wena ya xisati.