Swivuriso 26 - BIBELE Mahungu Lamanene

Matirhele ya swiphunta

¹ Ku dzunisa xiphunta a swi fanelanga, swi fana ni gamboko hi ximumu, kumbe mpfula leyi naka hi nkarhi wa ntshovelo.

² Nhlambha yo pfumala xivangelo, yi helela empfhukeni, yi fana ni xindzingiri lexi nga ku tihaheleni, kumbe mbewulana leyi tirhendzelekelaka.

³ Ximoko i xa hanci, tomu rona i ra mbhongolo, kasi nhlana wa xiphunta wu fanela hi nkhavi.

⁴ U nga tshuki u hlamula xiphunta, hi vuphukuphuku bya xona, hikuva na wena u nga ta fana na xona.

⁵ Xi hlamule hi ndlela leyi kombaka vuphukuphuku bya xona, hikuva xi nga ta ehleketa leswaku xi tlharihile.

⁶ Ku rhuma xiphunta i ku tivangela maxangu, swi fana ni ku titsema milenge.

⁷ Xivuriso lexi humaka enon'weni wa xiphunta, xi fana ni milenge ya munhu wa xigono, leyi nga n'wi pfuniki nchumu.

⁸ Ku nyika xiphunta swilo swa nkoka, swi fana ni ku bohelela ribye exipelupelwini.

⁹ Xivuriso lexi humaka enon'weni wa xiphunta, xi fana ni nkhavi wa mitwa, lowu khomiweke hi loyi a pyopyiweke.

¹⁰ Munhu loyi a tholaka xiphunta, kumbe vahundzi va ndlela, ú fana ni munhu loyi a copaka vanhu hi miseve.

¹¹ Mbyana yi tlhelela emahlanteni ya yona; swi tano ni xiphunta, xi nga ka xi nga tshiki ku endla swa vuphukuphuku bya xona.

¹² Xiphunta xa antswa, ku ri na munhu loyi a tivonaka a tlharihile.

Ta lavo loloha

¹³ Lolo ri ri: “Ku ni nghala egondzweni! Endleleni, ku ni dyinghala!”

¹⁴ Rivanti a ri fambi ku ya kule, hi mhaka ya swikinere, lolo na rona ri tano, ro vumbuluka-vumbuluka emubedweni wa rona.

¹⁵ Munhu wo loloha, ú hoxa voko exinkambaneni, kambe ku ri humesa a ri yisa enon'weni, i ntirho wo tika eka yena.

¹⁶ Lolo ri tivona ri tlharihile, ku tlula vavanuna va 7 lava nga hlamulaka mhaka hi ndlela leyi twalaka.

Swivuriso swin'wana

¹⁷ Ku nyanyuka u nghenelela loko van'wana va holova, swa fana ni ku khoma tindleve ta mbyana leyi tihundzelaka.

^18-19 Munhu loyi a xisaka muakelani, kutani a ku: “A ndzo ku vungunya”, ú fana ni munhu wa rihuhe loyi a hoxetelaka van'wana hi swilo leswi dlayaka ku fana ni swisana swa ndzilo ni miseve.

²⁰ Loko ku ri hava tihunyi, ndzilo wa timeka; madzolonga na wona ma kota ku hela, loko ku nga ri na munhu wo hleva.

²¹ Tihunyi ti pfurhisa makala, ni mavivi ma pfurhisa ndzilo; swi tano ni munhu wa tinyimpi, ú pfuxa madzolonga.

²² Marito ya muhlevi, a hi ku tsokombela ka wona, ma hatla ma nghena ma ya fika emakorhweni ya mbilu.

²³ Munhu loyi a fihlaka ku biha ka mbilu ya yena hi marito yo tsokombela, ú fana ni ximbitana lexi sasekisiweke ehandle hi xikope.

²⁴ Mukanganyisi ú fihla rivengo leri tateke mbilu ya yena, hi ku sasekisa marito ya yena;

²⁵ hambiloko a nandzihisa mavulavulele ya yena, u nga kholwi, hikuva embilwini ya yena, vubihi byi tele ku tlula mpimo.

²⁶ A nga ringeta ku fihla rivengo hi mano ya yena, kambe vubihi bya yena byi ta paluxiwa emahlweni ka vanhu hinkwavo.

²⁷ La celaka khele, ú ta wela eka rona, la khunguluxaka ribye, ri ta pyanya yena.

²⁸ Munhu wa mavunwa ú venga lava a va hembelaka, marito ya yena layo tsokombela, ma lovisa.