Swivuriso 25 - BIBELE Mahungu Lamanene

Swivuriso swin'wana swa Solomoni (25:1 – 29:27) Mahanyelo ya munhu wo tlhariha

¹ Leswi i swivuriso swin'wana swa Solomoni. Swi hlengeletiwile hi malandza ya Hezekiya hosi ya Yuda.

² Xikwembu xi dzunisiwa hi mhaka ya leswi ku nga ni swilo leswi tiviwaka hi xona ntsena, kasi tihosi ti dzunisiwa loko ti kota ku kambisisa timhaka.

³ Matilo ma le henhla swinene, ni misava yi entile ngopfu; swi tano ni leswi hosi yi ehleketaka swona: Munhu a nge swi tivi.

⁴ Susa thyaka eka silivhere, kutani muvumbi ú ta endla swilo swo saseka ha yona;

⁵ ni le mahlweni ka hosi, susa lavo homboloka, kutani vuhosi bya yona byi ta tiya hikwalaho ka leswo lulama.

⁶ Laha ku nga ni hosi, u nga tshuki u tivambavamba, u nga tiveki exikarhi ka lava va mavito,

⁷ hikuva swa antswa ku byeriwa leswaku: “Tshinela haleno!” ku ri ni ku khomisiwa tingana emahlweni ka mufumi wa tiko.

⁸ Loko u vona swilo, u nga tsutsumeli ku ya mangala, hikuva loko muakelani wa wena a ku kaneta, u ta endla yini xana?

⁹ Loko u ri ni mhaka na muakelani wa wena, yi kanele na yena; u nga tshuki u paluxa swihundla swa yena eka van'wana,

¹⁰ hikuva lava u byelaka vona, va nga ku khomisa tingana, kutani u lahlekeriwa hi ndzhuti.

¹¹ Marito lama vulavuriwaka enkarhini lowu faneleke, ma fana ni maapula ya nsuku exibyeni xa silivhere.

¹² Swiletelo swa vutlhari, eka munhu loyi a swi yingisaka, swi fana ni xingwavila xa nsuku, kumbe vuhlalu bya nkoka.

¹³ Munhu wo tshembeka loko a rhumiwile, ú fana ni ku titimela ka gamboko hi nkarhi wa ntshovelo, ú phyuphyisa moya wa n'wini wa yena.

¹⁴ Munhu loyi a tinyungubyisaka hi tinyiko leti a nga ti humesangiki, ú fana ni xihuhuri ni mapapa yo kala mpfula.

¹⁵ U nga heli mbilu loko u khongotela hosi, marito ya wena yo titsongahata ma ta tshova matimba ya vukari bya yona.

¹⁶ Vulombe, loko u byi kumile, dyana u pima, hikuva byi nga ku hlambisa timbilu, u hlanta;

¹⁷ u nga tati minkondzo emutini wa muakelani, hikuva a nga karhala hi wena, kutani a nga ha ku tsakeli.

¹⁸ Munhu loyi a lumbetaka muakelani hi vumbhoni byo hemba, wa dlaya ku fana ni xigiya, kumbe fumu, kumbe nseve wo tontswa.

¹⁹ Ku tshemba mukanganyisi enkarhini wa khombo, swi fana ni ku tshemba tino leri boleke, kumbe nenge lowu sulekeke.

²⁰ Ku yimbelelela munhu loyi a nga nhlomulweni, swi fana ni ku n'wi hluvula swiambalo loko ku titimela, kumbe ku n'wi chela munyu embangeni.

²¹ Loko nala wa wena a ri ni ndlala, n'wi nyike swakudya a dya, ni loko a ri ni torha, n'wi kele mati a nwa,

²² hikuva loko u endla sweswo, u ta n'wi khomisa tingana letikulu, kutani HOSI Xikwembu xi ta ku hakela.

²³ Moya lowu humaka elwandle wu tisa mpfula; swi tano ni munhu la hlevaka, ú hlundzukisa van'wana.

²⁴ Ku tshama elwangwini ra yindlu, swa antswa, ku ri na ku tshama endzeni ka yona, ni nsati wo kariha.

²⁵ Mahungu lamanene lama humaka etikweni ra le kule, ma fana ni mati layo titimela lama timulaka torha.

²⁶ Munhu wo lulama loyi a pfumelaka ku yengiwa hi lavo homboloka, ú fana ni xihlovo lexi pfindlusiweke, kumbe mati lama thyakisiweke.

²⁷ Ku dya vulombe ku tlula mpimo, a swi sasekanga. Swi tano ni loko u nkhensa munhu: U nga tati ngopfu marito.

²⁸ Munhu loyi a tsandzekaka ku tikhoma, ú fana ni muti lowu rirhangu ra wona ri mbundzumuxiweke.