Swivuriso 24 - BIBELE Mahungu Lamanene

19

¹ Vanhu vo biha timbilu, u nga va naveli, u nga naveli ni ku tshama na vona,

² hikuva leswi va swi ehleketaka i tihanyi ntsena; minkarhi hinkwayo va vulavula hi ku onha swa van'wana.

20

³ Vutlhari byi aka muti, wu tiyisiwa hi ku twisisa,

⁴ kutani vutivi byi nghenisa swilo swa nkoka, swo saseka swa tinxaka-xaka, etindlwini ta wona.

21

⁵ Munhu wo tlhariha ú tiyile ku tlula munhu wa matimba, ni munhu wa vutivi ú tlula loyi a nga ni ntamu.

⁶ Loko u ri ni vutlhari, u nga kota ku ya lwa nyimpi, kutani u ta hlula loko u ri ni vatsundzuxi lavo tala.

22

⁷ Xiphukuphuku a xi fikeli laha ku nga ni vutlhari, ehubyeni xi tsandzeka ni ku pfula nomo.

23

⁸ La nga ni makungu yo endla swo biha, ú ta vuriwa mupfilunganyi;

⁹ makungu ya xiphukuphuku i ku dyoha ntsena, musandzi, vanhu va n'wi venga.

24

¹⁰ Loko u hela mbilu hi siku ra khombo, swi komba leswaku a wu tiyanga.

25

¹¹ Ponisa lava yisiwaka eku dlayiweni, ni lava dlidlimbeteriwaka kona, va lamulele.

¹² Loko u ku: “Leswi, hina a hi nga swi tivi!” xana Loyi a vonaka swa le mbilwini, a nge swi kumi leswaku wa hemba xana? Loyi a hlayisaka vutomi bya wena, ú ta swi tiva, kutani ú ta avanyisa un'wana ni un'wana hi ku ya hi mintirho ya yena.

26

¹³ N'wananga, dyana vulombe, hikuva i byinene, ni xihlenge xa byona, a hi ku tsokombela ka xona.

¹⁴ Tiva leswaku vutlhari byi fana ni vulombe evuton'wini bya wena: Loko u ri ni vutlhari, u nga kanakani hi leswi nga ta humelela enkarhini lowu taka, naswona ku tshemba ka wena a ku nga heleli empfhukeni.

27

¹⁵ U nga yi u ya tumbelela munhu wo lulama laha a tshamaka kona, muti wa yena, u nga tshuki u wu hlasela,

¹⁶ hikuva munhu la lulameke, hambiloko o wa ka 7, ú tlhela a pfuka, kambe loko khombo ri fika, lavo homboloka va khuguka va wela makumu.

28

¹⁷ U nga tshuki u tsakisiwa hi ku wa ka nala wa wena, ni ku khuguka ka yena, ma nga vi mafenya eka wena,

¹⁸ hikuva loko HOSI Xikwembu xo swi vona, xi nge swi tsakeli, kutani xi ta tshika ku n'wi hlundzukela.

29

¹⁹ U nga tshuki u tipandzisa nhloko hikwalaho ka vadyohi, ni lavo homboloka, u nga va naveli,

²⁰ hikuva lavo homboloka, va nge hanyi ku ya kule, ni rivoni ra vadyohi ri ta timiwa.

30

²¹ N'wananga, chava HOSI Xikwembu ni tihosi, u nga twanani ni lava tisaka mpfilumpfilu,

²² hikuva vanhu lava va ta hatla va wela ekhombyeni, naswona i mani loyi a tivaka siku leri va nga ta herisiwa ha rona, xana?

Switsundzuxo swin'wana swa tintlhari

²³ Swin'wana switsundzuxo swa tintlhari, hi leswi: Ku ya hi nghohe eku avanyiseni ka timhaka, a swi sasekanga.

²⁴ Loyi a byelaka munhu wo homboloka, a ku: “A wu na nandzu”, u ta tivangela ku rhuketeriwa, vanhu lavo tala va ta n'wi venga.

²⁵ Kambe la nga chaviki ku tshinya vanhu vo homboloka, ú ta tsakeriwa, a kuma ni minkateko leyo tala.

²⁶ Munhu loyi a vulavulaka ntiyiso, i munghana wa wena wa xiviri.

²⁷ Rhanga u dyondza ku titirhela, u lulamisa ni masimu ya wena, hi kona u nga ta aka muti.

²⁸ U nga tshuki u lumbeta muakelani wa wena, ni ku n'wi hembela, u nga n'wi hembeli.

²⁹ U nga tshuki u ku: “Ndzi ta n'wi endla leswi a ndzi endleke swona; un'wana ni un'wana, ndzi ta n'wi hakela hi ku ya hi mintirho ya yena.”

³⁰ Ndzi tshama ndzi hundza hi le nsin'wini ya munhu wo loloha loyi a nga ehleketiki swinene, laha a byalaka vhinya ya yena kona.

³¹ Ndzi kuma nsimu yi tlhumile hi mitwa, laha hansi ku ri nhova ntsena, khumbi ra yona ra maribye ri wele hansi.

³² Kutani ndzi languta, ndzi xiyaxiya. Eku languteni ka mina, ndzi kume dyondzo:

³³ Loko u ku: “Ndza há kú bàà, ndzi etlelanyana switsongo, ndza ha khondlanyana mavoko, ndzi wisa”,

³⁴ vusiwana byi to nghena kukotisa khamba, ni vusweti ku fana ni xigevenga.