Swivuriso 22 - BIBELE Mahungu Lamanene

¹ Ku va ni vito lerinene, swi tlula ku va ni rifuwo lero tala, ku tsakeriwa, swi tlula silivhere ni nsuku.

² Swifumi ni swisiwana swi hlangana eka xilo xin'we: Hinkwavo va endliwile hi HOSI Xikwembu.

³ Munhu la twisisaka, ú vona khombo ra ha ri kule, kutani a tumbela, kasi lowo-ke-mano, ú tihoxa eka rona, kutani endzhaku a tilaya.

⁴ Titsongahate, u chava HOSI Xikwembu, kutani u ta kuma rifuwo, ni ku dzuneka, ni vutomi.

⁵ Ndlela ya munhu wa mahanyelo yo gombonyoka, yi ni mitwa ni mintlhamu, loyi a hlayisaka vutomi bya yena, wa swi papalata.

⁶ Komba n'wana wa wena ndlela ya vutomi a ha ri ntsongo, leswaku ni loko a kurile, a ta ka a nga hambuki eka yona.

⁷ Xisiwana xi ta fumiwa hi n'wankumi, ni mulombi ú ta va hlonga ra loyi a lombeke eka yena.

⁸ Loyi a byalaka moya lowo biha, ú ta tshovela makhombo ntsena, nkhavi lowu a baka vanhu ha wona, wu ta n'wi tshovekela.

⁹ Munhu loyi a hananaka, ú ta katekisiwa, hikuva leswi a nga na swona, ú dya ni swisiwana.

¹⁰ Hlongola musandzi, kutani madzolonga ma ta yima, ku holova ni ku rhuketelana swi ta hela.

¹¹ Loyi a tsakelaka ku va ni miehleketo leyinene, ni ku titsongahata loko a vulavula, ú ta va munghana wa hosi ya tiko.

¹² HOSI Xikwembu xi sirhelela marito ya vutivi, kambe leswi vulavuriwaka hi vakanganyisi, xa swi bakanya.

¹³ Lolo ri ri: “Ku ni nghala ehandle, loko ndzo huma, ndzi ta dlawa!”

¹⁴ Marito ya wansati wa dlakuta, i khele leri enteke, laha ku hojomelaka loyi a hlundzukeleke hi HOSI Xikwembu.

¹⁵ Vuphukuphuku byi namarhela mbilu ya lontshwa, kambe nkhavi wa byi namurhuta byi suka eka yena.

¹⁶ Loyi a xanisaka xisiwana, wo xi fumisa, loyi a nyikaka van'wankumi, wo tichela vusiwana.

Switsundzuxo swa 30 swa tintlhari

¹⁷ Rhiya ndleve, u yingisa switsundzuxo swa tintlhari, tikarhatele vutivi lebyi ndzi ku dyondzisaka byona;

¹⁸ loko u swi veka embilwini ya wena, ni loko swi tshama swi ri enon'weni wa wena, u ta va ni ntsako lowukulu.

¹⁹ Ndzi lava leswaku u tshemba HOSI Xikwembu, hikokwalaho namuntlha ndzi ku dyondzisaka wena hi xiviri.

²⁰ Ndzi ku tsalerile switsundzuxo swa 30, ma nga marito ya vutivi, lama tshinyaka.

²¹ Swi ta ku dyondzisa ku vona ntiyiso wa leswi vuriweke, kutani u ta tlherisela ntiyiso ntsena eka lava va ku rhumeke.

1

²² U nga tshuki u tekela xisiwana swilo swa xona hi mhaka ya leswi xi nga xisiwana, ni loko ku tengiwa timhaka, lava nga riki na nchumu, u nga va tshikeleli,

²³ hikuva HOSI Xikwembu xi ta va lwela, kutani xi herisa vutomi bya lava va va xanisaka.

2

²⁴ U nga tshuki u endla xinakulobye ni munhu wa ximbilwa-mbilwana, hambi munhu wa tihanyi, u nga tolovelani na yena,

²⁵ hikuva u nga tekelela mikhuva ya yena, kutani u wela entlhan'wini.

3

²⁶ U nga tshuki u tshembisa munhu un'wana ku n'wi hakelela swikweleti, kumbe ku tiboha ku dlaya milandzu ya yena,

²⁷ hikuva loko u nga tshuka u pfumala swo hakela ha swona, u ta tekeriwa mubedo, u sala u etlela ehansi.

4

²⁸ U nga tshuki u hundzuluxa mindzilekana leyi vatswari va wena va yi vekeke khale.

5

²⁹ Munhu loyi a tivaka ntirho wa yena, ú ta tirhela tihosi, a nge he tirheli vanhu va swiyimo swa le hansi.