Swivuriso 21 - BIBELE Mahungu Lamanene

¹ Mbilu ya hosi i xinambyana xa mati lexi fambisiwaka hi HOSI Xikwembu, xi yi jikisela hinkwako lomu xi ku rhandzaka.

² Hinkwaswo leswi munhu a swi endlaka, ú swi vona swi lulamile, kambe HOSI Xikwembu xi kambela mbilu ya yena.

³ HOSI Xikwembu xi tsakela ku lulama ni maavanyisele lamanene, ku tlula ku humeseriwa magandzelo.

⁴ Ku tikurisa ni manyunyu i rivoni ra lavo homboloka, kambe swa va dyohisa.

⁵ Makungu ya munhu wa migingiriko, ma ta n'wi vuyerisa, kasi un'wana ni un'wana loyi a tirhaka hi magugu, a nga ka a nga kumi nchumu.

⁶ Xuma lexi kumiweke hi ndlela ya vuxisi, xi dzudzeka ku fana ni mberha, i ntlhamu lowu vangelaka rifu.

⁷ Lavo homboloka va herisiwa hi mintirho ya vona ya tihanyi, hikuva va ala ku endla leswi lulameke.

⁸ Xigevenga xi ni mahanyelo layo biha, kasi munhu loyi a pfumalaka xisandzu, ú hanya hi ndlela leyinene.

⁹ Ku tshama elwangwini ra yindlu, swa antswa, ku ri na ku tshama endzeni ka yona, ni nsati wo kariha.

¹⁰ Munhu wo homboloka ú navela leswo biha ntsena, ni vaakelani va yena, a nga va languti hi tihlo lerinene.

¹¹ Lavo pfumala vutivi, va tlhariha loko va vona musandzi a biwa, kasi munhu wo tlhariha yena, loko a dyondzisiwa, ú engetelela vutivi bya yena.

¹² Munhu loyi a lulameke, ú xiyaxiya muti wa lavo homboloka: Lavo homboloka va wiseriwa ehansi va nyamalala.

¹³ Loyi a alaka ku yingisa swirilo swa swisiwana, na yena a nge yingisiwi, siku a nga ta lava ku pfuniwa.

¹⁴ Loko munhu a karihile, n'wi rhulise mbilu hi ku n'wi nyika nyiko exihundleni; loko a hlundzukile ngopfu, rheleta vukari bya yena hi nyiko.

¹⁵ Maavanyisele lamanene ya timhaka ma tsakisa lava lulameke, kambe ma tisa gome eka lavo biha timbilu.

¹⁶ Munhu loyi a hambukaka endleleni ya ku twisisa, ú ta tikuma a ri exikarhi ka vafi.

¹⁷ Loyi a tsakelaka ku tiphina, ú tichela vusiwana, loyi a rhandzaka vhinyo ni mafurha, a nge fumi.

¹⁸ Munhu lowo homboloka, hi yena la biwaka ematshan'weni ya lowo lulama; ematshan'weni ya lavo tshembeka, ku biwa vakanganyisi.

¹⁹ Ku tshama emananga u ri wexe, swa antswa, ku ri ni ku tshama ni nsati wo kariha, wa madzolonga.

²⁰ Mafurha ni xuma lexinene, swi kumeka emutini wa munhu wo tlhariha, kasi xiphunta xi hatla xi dya, xi heta.

²¹ Munhu wa tintswalo la tikarhatelaka leswo lulama, ú ta kuma vutomi, ni ku dzuneka, a endleriwa leswo lulama.

²² Munhu la tlhariheke, ú kota ku khandziya rirhangu, a nghena emutini wa vanhu va matimba, kutani a mbundzumuxa makhokholo lawa va ma tshembaka.

²³ Loyi a hlawulaka marito loko a vulavula, ú papalata makhombo.

²⁴ Munhu wa manyunyu, loyi a tikurisaka ngopfu ni ku langutela van'wana ehansi, ú vuriwa “musandzi”.

²⁵ Lolo ri fa hi ku navela, kambe mavoko ya rona ma chava ntirho.

²⁶ Siku hinkwaro, lolo ri le ku naveleni ka swilo, kasi lowo lulama wa hanana, a nga tsoni van'wana.

²⁷ Magandzelo ya munhu wo homboloka, HOSI Xikwembu xa ma venga, ngopfu-ngopfu loko a ma humesa a ri ni xikongomelo xo biha.

²⁸ Vumbhoni bya munhu wa mavunwa byi ta herisiwa, kasi marito ya loyi a yingisaka, ma nge hundzuki ni siku ni rin'we.

²⁹ Munhu wo homboloka ú tiyela ku khanyanisa xikandza ntsena, kasi lowo lulama ú tiyisela endleleni ya yena.

³⁰ Munhu, hambi a lo tlharihisa ku yini kumbe a twisisa ngopfu, a kuma ni switsundzuxo, a nge koti ku lwa na HOSI Xikwembu.

³¹ Hanci yi nga lulamiseriwa ku ya enyimpini, kambe ku hlula, swi huma eka HOSI Xikwembu.