Swivuriso 20 - BIBELE Mahungu Lamanene

¹ Vhinyo ya sandzisa, byalwa byi vanga huwa, hinkwavo lava yengiwaka hi swona, a va tlharihanga.

² Loko hosi yi karihile, yi chavisa ku fana ni nghala leyi bongaka, loyi a yi hlundzukisaka, ú tivangela rifu.

³ Munhu la tikhomaka loko va n'wi pfuka, wa xiximiwa, swiphukuphuku swona swi tshamela ku lwisa van'wana.

⁴ Munhu la lolohaka ku rima hi nguva ya kona, a nge tshoveli nchumu, hambi o swi lava.

⁵ Makungu ya mbilu i xidziva xa mati, lama nga kiwaka ntsena hi munhu wo twisisa.

⁶ Va tele vanhu lava tivulaka lavo tshembeka, kambe loyi hakunene a tshembekeke, wa kala swinene.

⁷ Munhu wo lulama loyi a endlaka leswi lulameke, ú siyela vana va yena ndzhaka ya minkateko.

⁸ Hosi leyi tshameke exiluvelweni xo avanyisa, yi kota ku hatla yi vona loyi a nga ni nandzu.

⁹ Xana ú kona loyi a nga vulaka a ku: “Mbilu ya mina yi basile, ndzi tengile, a ndza ha ri na swidyoho!” xana?

¹⁰ Ku xavisela vanhu xilo xin'we hi mimpimo yo hambana, HOSI Xikwembu xa swi venga.

¹¹ Hambi a ri n'wana, u ta n'wi tiva hi swiendlo swa yena, ú ta tikomba loko a tengile, a ri la lulameke.

¹² Ndleve leyi twaka, ni tihlo leri vonaka, swi endliwile hi HOSI Xikwembu hinkwaswo.

¹³ U nga rhandzi vurhongo, hikuva u nga tichela vusiwana, tshama u pfule mahlo, kutani u ta dya u xurha.

¹⁴ Muxavi ú ri: “U ndzi dlele, a swi xaveki!” kambe loko a suka kwalaho, ú sungula ku tibuma.

¹⁵ Nsuku ni swilo swo bomba, a hi ku tala ka swona, kambe marito ya vutivi i xuma lexi kalaka swinene.

¹⁶ Loko munhu a tiboha ku hakela milandzu ya loyi a nga n'wi tiviki, a a tekeriwe xiambalo; loko a tshembisa ku hakelela vanhu vambe eswikweleti, a a humese xo khomela ha xona.

¹⁷ Munhu a nga va a tiphina hi swakudya swo kumiwa hi vukanganyisi, kambe emakumu, ú ta twa wonge ú lo dya sava.

¹⁸ Makungu ma tiya hi switsundzuxo, ni nyimpi yi lwiwa hi swiletelo swa vutlhari.

¹⁹ Munhu wa gubya, ú paluxa swihundla, hikokwalaho, hambana ni munhu wo phyaphyarha ngopfu.

²⁰ Munhu loyi a rhuketelaka tata wa yena kumbe mana wa yena, rivoni ra yena ri ta timeka exinyamini lexikulu.

²¹ Ndzhaka leyi u yi vutlaka kunene, eku heteleleni yi nge ku tiseli minkateko.

²² Loko munhu a ku endla leswo biha, u nga tshuki u ku: “Ndzi ta rihisa!” Yimela HOSI Xikwembu, xona xi ta ku pfuna.

²³ Ku xavisela vanhu xilo xin'we hi mimpimo yo hambana, HOSI Xikwembu xa swi venga, ku tirhisa mimpimo leyi nga riki yona, a swi laveki.

²⁴ HOSI Xikwembu hi xona xi kombaka munhu endlela, hikuva yena a nga ku tivisa ku yini lomu a yaka kona xana?

²⁵ Swi ni khombo ku tsutsumela ku vula, u ku: “Xilo lexi, ndzi xi nyiketa HOSI Xikwembu!” kutani endzhaku u hundzuluxa miehleketo, eka leswi u tiboheke swona hi ku hlambanya.

²⁶ Lavo homboloka, hosi leyi tlhariheke ya va peperha, kutani yi va sila hi ribye.

²⁷ Ripfalo ra munhu, i rivoni ra HOSI Xikwembu, leri voningaka hinkwako endzeni ka yena.

²⁸ Hosi leyi nga ni tintswalo ni ku tshembeka, yi ta hlayiseka, vuhosi bya yona byi ta tiyisiwa hi leswo lulama.

²⁹ Lavantshwa va bomba hi matimba ya vona, lava dyuhaleke va tinyungubyisa hi timpfi.

³⁰ Nkhavi lowu twisaka ku vava, wu susa leswo biha, nhonga ya tlharihisa.