Swivuriso 2 - BIBELE Mahungu Lamanene

Vutlhari bya hakela

¹ N'wananga, amukela leswi ndzi ku byelaka swona, u hlayisa milawu ya mina,

² rhiya ndleve u yingisa swa vutlhari, u tikarhatela ku twisisa swilo;

³ ndzi ri, rilela vutlhari, u kombela ku twisisa,

⁴ swi hlote ku fana ni silivhere, u swi lava ku fana ni xuma lexi fihliweke,

⁵ kutani u ta twisisa leswaku ku chava HOSI Xikwembu swi vula yini, u tlhela u xi tiva.

⁶ HOSI Xikwembu hi xona xi nyikaka vutlhari, vutivi ni ku twisisa swi huma eka xona;

⁷ lava lulameke, xi va hlayisela minkateko, HOSI Xikwembu i xitlhangu xa lava tshembekeke,

⁸ hi xona xi sirhelelaka maavanyisele layo lulama, xi rindza tindlela ta vahlawuriwa va xona.

⁹ Loko u yingisa, u ta twisisa leswi lulameke, u tiva milawu leyinene ni ntiyiso, u tiva ni hinkwaswo leswi lavekaka,

¹⁰ kutani vutlhari byi ta ku letela, u tsakisiwa hi vutivi;

¹¹ mianakanyo leyinene yi ta ku sirhelela, u ta hlayisiwa hi ku twisisa;

¹² swi ta ku sivela ku endla leswo biha, ni ku nghena eka swivulavula swa vanhu lavo homboloka;

¹³ lava tshikeke tindlela leto lulama, va famba emunyameni,

¹⁴ lava tsakisiwaka hi ku endla swo biha, va tsakela mahanyelo layo homboloka;

¹⁵ mikhuva ya vanhu lava, yi gombonyokile, va hanya hi vuxisi ntsena.

¹⁶ Vutlhari byi ta ku ponisa eka wansati wa dlakuta, loyi a nga tshembekangiki, wa marito yo tsokombela,

¹⁷ la tshikeke loyi a n'wi tekeke evuntshweni bya yena, a tshova ntwanano wa yena ni Xikwembu xa yena.

¹⁸ Ku nghena endlwini ya yena i ku hojomela exivandleni xa vafi, ndlela yo ya eka yena yi yisa eku feni.

¹⁹ Hinkwavo lava yaka eka yena, a va vuyi, ni ndlela ya vutomi, a va ha yi kumi.

²⁰ Hikokwalaho, khoma ndlela ya vanhu lavanene, u nga hambuki ebuduleni ra lavo lulama;

²¹ hikuva lava lulameke, hi vona va nga ta tshama etikweni, eka rona, ku ta aka lava tshembekeke,

²² kambe lavo homboloka va ta hlongoriwa etikweni, vakanganyisi va ta susiwa eka rona.