Swivuriso 18 - BIBELE Mahungu Lamanene

¹ Loyi a nga twananiki na van'wana, ú lava tindlela to lwisa vanhu hinkwavo va mianakanyo leyinene.

² Xiphunta a xi tikarhateli ku twisisa mhaka, xo lava ntsena ku tivulavulela swa xona.

³ Ku biha mbilu, swi vitana ku sandziwa, ku endla swa tingana, swi vangela ndzhukano.

⁴ Marito ya munhu wo tlhariha, i xidziva lexi enteke, i nambu lowu hobomulanaka, kumbe xihlovo lexi pfelelaka.

⁵ Ku ntshunxa munhu wo homboloka ehubyeni, ni ku dyisa munhu wo lulama hi nandzu, swi bihile.

⁶ Marito ya xiphunta ma pfuxa madzolonga, xi tilavela timbanga hi ku vulavula ka xona.

⁷ Nomo wa xiphunta wu xi vangela khombo, xi tiphasa hi marito ya xona.

⁸ Marito ya muhlevi, a hi ku tsokombela ka wona, ma hatla ma nghena, ma fika emakorhweni ya mbilu.

⁹ Loyi a lolohaka entirhweni wa yena, a nga hambananga na loyi a tsakelaka ku onha ntsena.

¹⁰ HOSI Xikwembu i khokholo lero tiya, leri munhu wo lulama a tsutsumaka a ya tumbela eka rona.

¹¹ Khokholo ra n'wankumi i rifuwo ra yena, ú ehleketa leswaku i rirhangu leri n'wi sirhelelaka.

¹² Munhu wo tikukumuxa, ú helela ekhombyeni; rhanga u titsongahata, hi kona u nga ta dzunisiwa.

¹³ U nga tsutsumeli ku hlamula mhaka u nga si yi twisisa, hikuva swi nga paluxa ku tsandzeka ka wena, swi ku khomisa ni tingana.

¹⁴ Ku tsaka ka mbilu, swi tiyisa munhu emavabyini; kambe loyi a khunguvanyekeke, a nga ka a nga tiyiseli.

¹⁵ Munhu wo tlhariha, ú rhandza vutivi, ú tsakela ku yingisela byona ntsena.

¹⁶ Loyi a nga ni swa le mandleni, wa tsakeriwa, hambi va ri lava mavito, va n'wi amukela.

¹⁷ Munhu loyi a rhangaka a boxa mhaka ya yena, ú vonaka a vulavula ntiyiso, ku kondza ku humelela loyi a n'wi kanetaka.

¹⁸ Mhaka ya vanhu va matimba lava lwetanaka, yi nga tsemiwa hi ku hoxa vuhlolotwana.

¹⁹ Ku pfuna makwenu i ku tiakela rirhangu, kasi ku holova na yena i ku pfala khokholo, u sala ehandle.

²⁰ Munhu ú kuma hakelo leyinene ya marito ya yena, leswi a swi vulavulaka, swa n'wi vuyerisa.

²¹ Rifu ni vutomi, swi lawula hi ku vulavula ka munhu, lava rhandzaka ku vulavula, va ta tshovela mihandzu ya kona.

²² Ku kuma nsati, i nkateko, i ku tsakeriwa hi HOSI Xikwembu.

²³ Xisiwana xi kombela hi ku titsongahata, kambe n'wankumi ú hlamula hi ku rhandza.

²⁴ Vanhu vo tala va nga tiendla vanghana va wena, kambe exikarhi ka vona, i un'we ntsena loyi a ku rhandzaka kukota makwenu.