Swivuriso 16 - BIBELE Mahungu Lamanene

Matirhele ya Xikwembu

¹ Munhu a nga endla makungu, kambe HOSI Xikwembu hi xona lexi nga ni rito ro hetelela.

² Hinkwaswo leswi munhu a swi endlaka, ú swi vona swi tengile, kambe HOSI Xikwembu xi kambela miehleketo ya yena.

³ Loko u endla xilo, kombela HOSI Xikwembu xi ku pfuna, kutani makungu ya wena ma ta katekisiwa.

⁴ Hinkwaswo leswi HOSI Xikwembu xi swi tumbuluxeke, swi ni lomu swi kongomeke kona, hambi va ri lavo homboloka, va kongoma esikwini ra khombo.

⁵ HOSI Xikwembu xi nyenya un'wana ni un'wana loyi a tikurisaka, munhu wo tano a nge poni, ú ta biwa hakunene.

⁶ Munhu loyi a nga ni tintswalo, a tlhela a tshembeka, HOSI Xikwembu xa n'wi rivalela milandzu ya yena, naswona loyi a xi chavaka, ú kota ku papalata leswo biha.

⁷ Munhu loyi HOSI Xikwembu xi tsakelaka vutomi bya yena, xi endla leswaku hambi va ri valala va yena, va hanyisana na yena hi ku rhula.

⁸ Ku va ni swilo switsongo leswi u swi kumeke hi tindlela letinene, swi tlula ku va ni xuma lexo tala lexi u xi kumeke hi tindlela leto biha.

⁹ Munhu a nga endla makungu ya lomu a yaka kona, kambe HOSI Xikwembu hi xona xi nga ta n'wi komba ndlela.

Tihosi ta chaviseka

¹⁰ Leswi hosi ya tiko yi vulaka swona, yi lo hlavuteriwa, loko yi tsema mhaka, a yi hoxi.

¹¹ Mimpimo leyi nga yona, i ya HOSI Xikwembu, hinkwayo yi endliwile hi xona.

¹² Emahlweni ka tihosi, swa yila ku endla leswo biha, hikuva vuhosi byi tiyisiwa hi leswo lulama.

¹³ Tihosi ti tsakela lava vulavulaka ntiyiso, ti rhandza lava vulaka leswi nga swona.

¹⁴ Vukari bya hosi byi nga vanga rifu, munhu wo tlhariha ú ringeta ku yi rheleta mbilu.

¹⁵ Loko hosi yi n'wayitela, ku ni vutomi, ku tsakeriwa hi yona, swi fana ni mapapa lama tisaka mpfula ya ximun'wana.

Mahanyelo lama hanyisaka

¹⁶ Ku kuma vutlhari, swi tlula ku kuma nsuku, ku hlawula ku twisisa, swi tlula ku hlawula silivhere.

¹⁷ Gondzo ra lavo lulama ri papalata leswo biha, hinkwavo lava fambaka eka rona, va ponisa vutomi bya vona.

¹⁸ Ku tikurisa, swi vitana khombo, manyunyu ma vangela munhu ku wa.

¹⁹ Swa antswa ku titsongahata, u hanya ni swisiwana, ku ri ni ku avelana ni vanhu lavo tikurisa swilo leswi va swi phangheke.

²⁰ Munhu loyi a amukelaka switsundzuxo, ú ta humelela; loyi a tshembaka HOSI Xikwembu, ú ta kuma minkateko.

²¹ Munhu loyi a tlhariheke, u ta vuriwa “la twisisaka”; hi ku tsokombela ka marito ya yena, ú kota ku khorwisa vanhu.

²² Loyi a nga ni vutlhari, ú ni xihlovo xa vutomi, kambe swiphukuphuku swi biwa hikwalaho ka vuphukuphuku bya swona.

²³ Munhu wa miehleketo ú kota ku vulavula hi vutlhari, a khorwisa van'wana hi marito ya yena.

²⁴ Marito lama tsakisaka ma fana ni xihlenge xa vulombe, lexi nandzihaka enon'weni, xi tlhela xi tiyisa miri.

²⁵ Ku ni ndlela leyi munhu a yi vonaka yi lulamile, kasi eku heteleleni, yi yisa eku feni.

²⁶ Munhu loyi a tirhaka, ú susumetiwa hi ndlala, i khwiri leri ri n'wi sindzisaka.

²⁷ Loyi a nga pfuniki nchumu, ú luka mano layo biha, leswi humaka enon'weni wa yena, i malangavi ya ndzilo.

²⁸ Munhu wa mbilu yo biha, ú pfuxa madzolonga, loyi a hlevaka, ú lwisa vanghana.

²⁹ Munhu wa tihanyi, ú kucetela muakelani wa yena, a n'wi yisa etindhawini leto biha.

³⁰ Loyi a tshunyetaka hi mahlo, u le ku lukeni ka mano layo biha, loyi a lumaka nomo, ú hetile makungu ya yena layo homboloka.

³¹ Timpfi i harhi yo dzuneka, leyi kumiwaka hi vanhu va mahanyelo lamanene.

³² Loyi a hlwelaka ku hlundzuka, ú tlula nghwazi, munhu la kotaka ku tikhoma, ú tlula loyi a hlulaka miti.

³³ Vanhu va nga vutisa timhaka hi ku hoxa vuhlolotwana, kambe nhlamulo, yi tiva hi HOSI Xikwembu ntsena.