Swivuriso 15 - BIBELE Mahungu Lamanene

¹ Ku hlamula hi ndlela yo titsongahata, swi rheleta vukari, kasi ku karihela vanhu, swa byi pfurhisa.

² Ku vulavula ka munhu wo tlhariha, ku nandzihisa vutivi, kambe milomo ya swiphunta yi khapa vuphukuphuku.

³ HOSI Xikwembu xi languta matlhelo hinkwawo, xi xiyaxiya va mintirho leyo biha ni va mintirho leyinene.

⁴ Marito yo tsakisa i murhi lowu nyikaka vutomi, kasi lama khunguvanyisaka ma heta matimba.

⁵ Xiphukuphuku xi sandza swiletelo swa tata wa xona, kambe loyi a pfulekeke miehleketo, ú pfumela ku tshinyiwa.

⁶ Emutini wa lowo lulama, ku ni rifuwo lero tala, kasi xuma xa lowo homboloka xa hangalasiwa.

⁷ Loko munhu wo tlhariha a vulavula, ú haxa vutivi, kasi emiehleketweni ya swiphunta a ku humi nchumu!

⁸ Magandzelo ya munhu wo homboloka, HOSI Xikwembu xa ma nyenya, kambe xi tsakela xikhongelo xa munhu wo lulama.

⁹ HOSI Xikwembu xi venga mikhuva ya munhu lowo homboloka, kasi munhu loyi a tikarhatelaka leswo lulama, xa n'wi rhandza.

¹⁰ Loyi a tshikaka mikhuva leyinene, ú ta biwa swinene, ni loyi a alaka ku tshinyiwa, ú ta fa.

¹¹ Leswi HOSI Xikwembu xi vonaka ni leswi swi nga hansi, exivandleni xa vafi, xana xi nga tsandza hi yini ku vona leswi nga timbilwini ta vanhu xana?

¹² Musandzi a nga swi lavi ku tshinyiwa, a nge pfuki a yile eka lavo tlhariha.

¹³ Loko mbilu yi tsakile, nghohe yi n'wayitela, kasi loko mbilu yi vava, munhu ú hela matimba.

¹⁴ Munhu loyi a twisisaka, ú lava vutivi, kasi swiphunta swi hanya hi ku vulavula swa vuphukuphuku ntsena.

¹⁵ Masiku hinkwawo, swisiwana swi hanya enhlomulweni, kasi ku va ni mbilu leyi tsakeke, i nkhuvo lowu nga heriki.

¹⁶ Xisiwana lexi chavaka HOSI Xikwembu, xi fumile ku tlula loyi a nga ni xuma lexo tala, lexi n'wi pfumataka vurhongo.

¹⁷ Ku dya miroho ni lava va ku rhandzaka, swi tlula ku dya nyama yo nona ni lava va ku vengaka.

¹⁸ Munhu wa ximbilwa-mbilwana ú pfuxa madzolonga, kasi loyi a tiyiselaka swilo, ú miyeta ku holova.

¹⁹ Ndlela yo lolo yi tlhumile hi mitwa, kasi gondzo ra lowa migingiriko, ri khuleriwile ri basa.

²⁰ N'wana la tlhariheke ú tsakisa vatswari vakwe, kambe la tiarisaka, wa va sandza.

²¹ Vuphukuphuku byi tsakisa loyi a nga ehleketiki, kasi munhu wo twisisa, ú languta laha a yaka kona ntsena.

²² Laha ku nga riki na ku tsundzuxana, makungu ma helela empfhukeni, kasi loko ku ri ni vatsundzuxi lavo tala, makungu ma humelela.

²³ Munhu wa tsaka loko a hlamurile mhaka hi ndlela leyi nga yona; a hi ku nandziha ka swona ku vula rito leri faneleke hi nkarhi wa kona!

²⁴ Ndlela leyi munhu wo tlhariha a yi khomeke, yi tlhandlukela evutomini, leswaku a ta ka a nga rheleli exivandleni xa vafi.

²⁵ HOSI Xikwembu xi mbundzumuxa miti ya lava tikurisaka, kambe xi sirhelela noni ni swilo swa yona.

²⁶ HOSI Xikwembu xi nyenya miehleketo ya lavo homboloka, kambe emahlweni ka xona, marito lama tsakisaka, ma tengile.

²⁷ Munhu loyi a nga ni makwanga, ú vangela muti wa yena ekhombo, kambe loyi a alaka ku xaviwa, ú ta hanya.

²⁸ Munhu wo lulama, ú sungula a ehleketa a nga si hlamula, kasi emilon'wini ya lavo homboloka, ku khuluka manyala ntsena.

²⁹ HOSI Xikwembu a xi tshineli kusuhi ni lavo homboloka, kambe swikhongelo swa lavo lulama, xa swi hlamula.

³⁰ Nghohe leyi n'wayitelaka, ya tsakisa, mahungu lamanene ma tiyisa nhlana.

³¹ Loyi a nkhensaka ku tshinyiwa, ú ta hanya; loko a ri exikarhi ka lavo tlhariha, ú ta titwa a ntshunxekile.

³² Munhu loyi a bakanyaka switsundzuxo, wa tidlaya, kasi loyi a yingisaka loko a tshinyiwa, ú engetelela ku twisisa.

³³ Loko u chava HOSI Xikwembu, u le ku dyondzeni ka vutlhari; rhanga hi ku titsongahata, hi kona u nga ta dzunisiwa.