Swivuriso 14 - BIBELE Mahungu Lamanene

¹ Wansati la tlhariheke, ú tiakela muti, kasi la nga xiphukuphuku wa wu hahlula.

² Loyi a nga ni mahanyelo lamanene, ú chava HOSI Xikwembu, kambe loyi a nga ni mikhuva yo gombonyoka, wa xi sandza.

³ Ku vulavula ka xiphukuphuku ku xi nghenisa etimhakeni, kasi marito ya lavo tlhariha ma va sirhelela.

⁴ Laha ku nga riki na tihomu, mavele ku hava, ntshovelo lowukulu wu tisa hi ntamu wa homu.

⁵ Mbhoni leyi tshembekeke yi vulavula ntiyiso, leyi nga tshembekangiki, a hi ku hemba ka yona!

⁶ Musandzi ú lava vutlhari, kambe a nga byi kumi, munhu la twisisaka, ú kuma vutivi hi ku olova.

⁷ Hambana ni xiphunta, hikuva a xi nga ku dyondzisi nchumu!

⁸ Vutlhari bya munhu wa miehleketo, byi n'wi komba ndlela, kasi vuphukuphuku bya swiphunta, bya swi kanganyisa.

⁹ Lavo homboloka, ku dyoha a swi va karhati, kasi lavo lulama va twelana vusiwana.

¹⁰ Mahlomulo ma twa hi n'winyi wa wona, ni ntsako wa yena wu nga ka wu nga twi hi un'wana.

¹¹ Yindlu ya munhu wo homboloka yi ta hahluriwa, kasi dladla ra munhu wo tshembeka ri ta katekisiwa.

¹² Ku ni swilo leswi munhu a nga swi vonaka swi lulamile, kasi eku heteleleni, swi yisa eku feni.

¹³ Munhu a nga hleka, kasi mbilu ya vava, mafenya ma hela hi nhlomulo.

¹⁴ Loyi a nga ni mahanyelo yo biha, ú tshovela mihandzu ya swiendlo swa yena, na yena lonene, ú vuyeriwa hi mihandzu ya mintirho ya yena.

¹⁵ Munhu wo kala mano, ú pfumelela hinkwaswo, kasi munhu wa miehleketo, ú languta ntsena lomu a kongomaka kona.

¹⁶ La tlhariheke wa xiyaxiya, a papalata leswo biha, kambe xiphunta xi ni magugu, xi wela swilo ehenhla.

¹⁷ Munhu wa ximbilwa-mbilwana ú endla swilo hi ndlela ya vuphukuphuku, kasi munhu wa miehleketo wa tiyisela.

¹⁸ Hakelo ya vanhu vo kala mano, i vuphukuphuku, kasi vutivi i harhi enhlokeni ya lava nga ni miehleketo.

¹⁹ Munhu wa mintirho yo biha ú ta nkhinsamela lavanene, ni munhu wa mintirho yo homboloka ú ta va ehansi ka lavo lulama.

²⁰ Xisiwana a xi tsakeli hi munhu, hambi va ri vaakelani va xona, kasi n'wankumi ú ni vanghana lavo tala.

²¹ Ku sandza munhu-kuloni, i xidyoho, kasi loyi a nga ni tintswalo eka swisiwana wa kateka.

²² Lava lukaka mano layo biha, va endla xihoxo; lava nga ni makungu lamanene, vanhu va va tsakela ni ku va tshemba.

²³ Hinkwavo lava tikarhataka, va vuyeriwa, kambe lava tshamelaka ku phyaphyarha ntsena, vo tichela vusiwana.

²⁴ Rifuwo i harhi ya vuhosi enhlokweni ya lowo tlhariha, kasi xiphukuphuku xi bomba hi vuphukuphuku bya xona.

²⁵ Mbhoni leyi vulaka ntiyiso, ya ponisa, kasi leyi vulavulaka mavunwa, ya dlayisa.

²⁶ Ku chava HOSI Xikwembu, swi nyika munhu ku tshemba loku tiyeke, ni vana va yena va ta va ni ndhawu yo tumbela eka yona.

²⁷ Ku chava HOSI Xikwembu i xihlovo xa vutomi, lexi ponisaka munhu entlhan'wini wa rifu.

²⁸ Hosi i vanhu, laha ku nga riki na vanhu, vuhosi bya hela.

²⁹ Munhu loyi a kotaka ku tiyisela swilo, ú twisisa ngopfu, kasi munhu wa ximbilwa-mbilwana, u nyanya ku paluxa vuphukuphuku bya yena.

³⁰ Mbilu leyi tsakeke, yi horisa miri, kasi ku vilela, swi fana ni vuvabyi byo borisa marhambu.

³¹ Loyi a xanisaka xisiwana, ú le ku rhuketeleni ka Mutumbuluxi wa xona, kasi loyi a nga ni tintswalo eka vapfumari, ú dzunisa Muvumbi.

³² Munhu wo homboloka ú wisiwa hi mintirho ya yena leyo biha, kasi lowo lulama ú sirheleriwa hi mahanyelo ya yena lamanene.

³³ Vutlhari byi aka emiehleketweni ya munhu loyi a twisisaka, kambe eka swiphunta a byi tshami.

³⁴ Ku lulama swi kurisa tiko, kasi xidyoho xi khomisa vanhu tingana.

³⁵ Nandza wa miehleketo, hosi ya n'wi tsakela, kambe vukari bya yona byi wela loyi a endlaka leswi khomisaka tingana.