Swivuriso 12 - BIBELE Mahungu Lamanene

¹ Loyi a rhandzaka ku tsundzuxiwa, ú rhandza vutivi, kambe loyi a vengaka ku tshinyiwa, wa hlanya.

² Munhu lonene, HOSI Xikwembu xa n'wi tsakela, kambe munhu wa makungu layo biha, xa n'wi avanyisa.

³ Munhu wa mintirho yo homboloka, a nga hlweli ku wela hansi, kasi munhu wo lulama ú ni timitsu leti nga simulekiki.

⁴ Wansati wa migingiriko i harhi ya vuhosi enhlokweni ya nuna wa yena, kasi wansati loyi a khomisaka nuna wa yena tingana, ú fana ni vuvabyi lebyi borisaka marhambu.

⁵ Makungu ya vanhu lavo lulama i manene, kasi switsundzuxo swa lavo homboloka swa kanganyisa.

⁶ Marito ya lavo homboloka ma nga vanga rifu, kasi lavo lulama va ponisa vanhu hi ku vulavula ka vona.

⁷ Lavo homboloka va wela makumu, va nyamalala, kasi miti ya lavo lulama ya tiya.

⁸ Munhu ú nkhensiwa hikwalaho ka mianakanyo ya yena leyinene, kasi munhu wa miehleketo yo gombonyoka, wa sandziwa.

⁹ Munhu wa xiyimo xa le hansi etikweni la nga ni nandza un'we ntsena, ú tlula loyi a tiendlaka munhu wa le henhla, kasi ú etlela ni ndlala.

¹⁰ La lulameke ú tsetselela swifuwo swa yena, kambe vanhu va tihanyi, va swi xanisa.

¹¹ Munhu loyi a rimaka, ú ta dya a xurha, kambe loyi a landzelelaka leswi nga pfuniki nchumu, a nga ehleketi swinene.

¹² Lowo homboloka ú navela bindzu ra lavo biha, kasi lavo lulama va ni timitsu leti nga simulekiki.

¹³ Loyi a biheke mbilu, ú phasiwa hi marito ya yena layo homboloka, kambe la lulameke wa pona ekhombyeni.

¹⁴ Munhu ú kuma hakelo leyinene ya marito ya yena, mintirho ya mavoko ya yena ya n'wi vuyerisa.

¹⁵ Xiphukuphuku xi tivona xi ri endleleni leyo lulama, kasi munhu wo tlhariha ú amukela switsundzuxo.

¹⁶ Xiphukuphuku xi hatla xi komba ku khunguvanyeka ka xona, kambe munhu loyi a ehleketaka, wa swi kota ku tikhoma, loko a rhuketeriwa.

¹⁷ Loyi a vulavulaka ntiyiso, ú nyika vumbhoni lebyinene, kasi loyi a vulavulaka mavunwa, ú tele vukanganyisi.

¹⁸ Vanhu vo hatla ku vulavula, marito ya vona ma tlhava ku fana ni fumu, kasi marito ya lavo tlhariha ma horisa.

¹⁹ Marito ya ntiyiso ma tshama hilaha ku nga heriki, kambe mavunwa a ma tlhaveli hi sana.

²⁰ Vukanganyisi byi le timbilwini ta lava endlaka swo biha, kasi lava nga ni makungu lama tisaka ku rhula, va tsakile.

²¹ Lowo lulama a nga weli hi khombo, kasi lavo homboloka va rhendzeriwa hi maxangu.

²² HOSI Xikwembu xi nyenya lava vulavulaka mavunwa, kambe lava tshembekaka, xa va tsakela.

²³ Munhu loyi a nga ni vutivi, a nga tikombi, kasi swiphunta swi paluxa vuphukuphuku bya swona.

²⁴ Vanhu va migingiriko va ta va valawuri, kasi lavo loloha va ta rhwexiwa mintirho yo tika.

²⁵ Ku vilela ku heta munhu matimba, kambe marito lamanene ma n'wi tiyisa.

²⁶ Lowo lulama ú hambana ni leswo biha, kasi mikhuva ya lavo homboloka ya va lahla.

²⁷ Munhu wo loloha a nga vuyi na nchumu eku hloteni, kambe munhu wa migingiriko ú kuma rifuwo lero saseka.

²⁸ Lavo lulama va khoma ndlela ya vutomi, kasi ndlela ya lavo homboloka yi yisa eku loveni.