Swivuriso 11 - BIBELE Mahungu Lamanene

¹ Ku xavisela vanhu swilo hi mpimo lowu nga riki wona, HOSI Xikwembu xa swi venga, kambe mpimo lowu wu nga wona, xa wu tsakela.

² Ku tikurisa swi vitana tingana, kasi vutlhari byi ni lava va titsongahataka.

³ Ku tshembeka ka lava lulameke ku va komba ndlela, kambe vumbabva bya vakanganyisi byi va peta nhloko.

⁴ Esikwini ra ku hlundzuka ka HOSI Xikwembu, rifuwo a ri pfuni nchumu, kambe ku lulama ku ponisa vutomi bya munhu.

⁵ La nga riki na nandzu, ú basiseriwa ndlela hi ku lulama ka yena, kasi lowo homboloka ú wisiwa hi swiendlo swa yena.

⁶ Lavo lulama va ponisiwa hi mintirho ya vona, kasi vakanganyisi va phasiwa hi ku navela ka vona.

⁷ Loko lowo homboloka a fa, ku tshemba ka yena ka hela, ni rifuwo leri a tisetelaka ha rona a ra ha n'wi pfuni nchumu.

⁸ Loyi a lulameke wa humesiwa ekhombyeni, kutani ematshan'weni ya yena, ku nghenisiwa lowo homboloka.

⁹ La nga vuriki nchumu hi Xikwembu, a nga dlaya munhu-kulobye hi ku vulavula ka yena, kasi lavo lulama va ponisiwa hi vutivi bya vona.

¹⁰ Loko lowo lulama swi n'wi fambela kahle, muti wa tsaka, ni loko lowo homboloka a lova, ku biwa minkulungwana ya ntsako.

¹¹ Minkateko leyi humaka eka lavo lulama, yi kurisa muti, kambe marito ya lavo homboloka, ma wu hahlula.

¹² Loyi a sandzaka munhu-kulobye a nga ehleketi, kambe loyi a twisisaka, wo timiyelela.

¹³ Munhu wa gubya ú paluxa swihundla, kambe loyi a tshembekeke, ú hlayisa timhaka.

¹⁴ Laha ku nga hava switsundzuxo, tiko ra wa, kasi laha ku nga ni vatsundzuxi lavo tala, ra hlayiseka.

¹⁵ Loyi a tiboheke ku hakelela xi-ta-xi-famba milandzu ya xona, ú ta tisola, kambe loyi a yimaka kule na swona, ú hlayisekile.

¹⁶ Wansati wa tintswalo ú kuma ku dzuneka, wanuna wa xivindzi ú kuma rifuwo.

¹⁷ Munhu wa mafundza wa vuyeriwa, kambe lowa nsele ú tivangela ku vaviseka.

¹⁸ Munhu wo homboloka a nga holi swo nyawula, kasi loyi a seketelaka leswo lulama, a nga kanakani hi hakelo ya yena.

¹⁹ Loyi a tiyiselaka eku lulameni, ú ta hanya, kambe loyi a landzelelaka leswo biha, ú ya eku loveni.

²⁰ Vanhu va mianakanyo yo gombonyoka, HOSI Xikwembu xa va nyenya, kambe xi tsakela lava pfumalaka xisandzu.

²¹ Lowo homboloka a nge poni, ú ta biwa hakunene! Kambe lava lulameka va ta pona.

²² Wansati wo saseka nghohe, kambe a nga ehleketi, ú fana ni sindza ra nsuku enhompfini ya nguluve.

²³ Ku navela ka lavo lulama ku hela hi leswinene ntsena, kambe ku langutela ka lavo homboloka ku helela eku avanyisiweni.

²⁴ Munhu loyi a hananaka, ú tala ku fuma, kasi munhu wo tsonana ngopfu, ú tala ku heleriwa hi swa yena.

²⁵ Munhu wo hanana ú ta dya a xurha, ni loyi a nyikaka van'wana mati, na yena ú ta nyikiwa.

²⁶ Loyi a alaka ku xavisa mavele ya yena, ú ta rhuketeriwa hi vanhu, kasi loyi a va xaviselaka, va ta n'wi navelela minkateko.

²⁷ Loyi a tikarhatelaka leswinene, wa tsakeriwa, kasi loyi a lavaka leswo homboloka, swi kuma yena.

²⁸ Loyi a tshembaka rifuwo ra yena, ú ta wa, kambe lowo lulama ú ta tsaka ku fana ni murhi lowu hlukaka.

²⁹ Loyi a xanisaka va ka vona, ú tivangela xidzedze, xiphukuphuku xi ta va hlonga ra lavo tlhariha.

³⁰ Munhu wo lulama i murhi wa mihandzu leyi nyikaka vutomi, kasi munhu wa tihanyi ú herisa vutomi bya vanhu.

³¹ Leswi munhu wo lulama a kumaka hakelo ya mintirho ya yena emisaveni, xana lavo homboloka ni vadyohi, va nge yi kumi ya vona hakelo xana?