Swivuriso 1 - BIBELE Mahungu Lamanene

¹ Leswi i swivuriso swa Solomoni n'wana Davhida, hosi ya Israele.

Ku pfuna ka swivuriso

² Swivuriso swi pfuna vanhu ku tiva vutlhari ni swiletelo, ni ku twisisa marito ya tintlhari,

³ swi nyika vanhu swiletelo swa mahanyelo lamanene, va ta tiva leswi lulameke, ni milawu leyinene, ni ntiyiso.

⁴ Swivuriso swi tlharihisa lavo pfumala mano, swi nyika lavantshwa vutivi ni mianakanyo leyinene.

⁵ Na yena loyi a tlhariheke, loko a swi landza, ú ta dyondza a ya emahlweni. Munhu loyi a twisisaka, ú kuma switsundzuxo,

⁶ a kota ku hlamusela swivuriso ni swifananiso, a twisisa marito ya tintlhari ni mavulavulele ya tona.

⁷ Masungulo ya vutivi i ku chava HOSI Xikwembu; lava alaka ku dyondzisiwa ni ku leteriwa i swiphukuphuku!

Switsundzuxo eka lavantshwa

⁸ N'wananga, yingisa swiletelo swa tata wa wena; ni milawu ya mana wa wena, u nga tshuki u hambana na yona:

⁹ Swi ta va harhi yo saseka enhlokweni ya wena, ni vuhlalu bya nkoka enhan'wini ya wena.

¹⁰ N'wananga, u nga tshuki u pfumela ku yengiwa hi vadyohi.

¹¹ Va nga ku byeletela va ku: “Tana hi famba swin'we, hi ya tumbelela vanhu, hi va dlaya. A hi ye hi ya yimela vahundzi va ndlela, lava nga tiviki nchumu.

¹² A hi va miteni va ri karhi va hanya, va fambisa sweswo, va rhelela ekheleni ra xivandla xa vafi.

¹³ Hi ta kuma swilo swa nkoka swa tinxaka-xaka, hi tata tindlu ta hina hi leswi hi swi phangheke.

¹⁴ Nghena entlaweni wa hina, hinkwerhu hi ta phakana hi ringana!”

¹⁵ N'wananga, u nga tshuki u tolovelana ni vanhu vo tano, ni mikhuva ya vona, u nga yi landzeleli,

¹⁶ hikuva a va hlweli ku endla leswo biha, va hatla ku halata ngati.

¹⁷ A swi pfuni nchumu ku rhiya xitsendzele tinyanyana hinkwato ti langutile:

¹⁸ Vanhu lava va le ku rhiyeni ka ntlhamu lowu nga ta tlhela wu phasa vona; eku tumbeleleni ka vona, hi vona va nga ta lahlekeriwa hi vutomi.

¹⁹ Vanhu hinkwavo lava kumeke rifumo hi tihanyi, va hanyisa sweswo. Rifumo ra kona ri va vangela rifu.

Vutlhari bya huwelela

²⁰ Vutlhari bya huwelela emagondzweni, erivaleni ku twala rito ra byona leri tlakukeke;

²¹ byi yima ni le henhla ka khumbi byi huwelela, byi vulavula ni le tinyangweni ta muti, byi ku:

²² “N'wina lavo-ke-mano, mi ta pfumala vutivi ku fikela rini ke? Vasandzi va ta tshika rini ku sandza, ni swiphunta swi ta venga ku twisisa ku fikela rini ke?

²³ Yingisani, ndzi mi laya mina vutlhari, ndzi lombeni tindleve ndzi mi tsundzuxa, ndzi mi byela leswi nga mbilwini ya mina.

²⁴ Ndzi huwelerile, kambe a mi pfumelanga, ndzi mi kowetile, kambe a ku vanga na un'we loyi a teke.

²⁵ Minkarhi hinkwayo loko ndzi mi tsundzuxa, mi pfarile tindleve, a mi lavanga ku twa loko ndzi mi tshinya.

²⁶ Hikokwalaho, na mina ndzi ta mi hlekula loko khombo ri mi fikerile, ndzi ta mi yowetela loko mi ri karhi mi rhurhumela hi ku chava,

²⁷ loko nchavo wu mi terile tanihi xidzedze, ni makhombo ma ta ku fana ni xihuhuri, ni loko mi fikeriwile hi gome ni nhlomulo.

²⁸ “Va ta ndzi huwelela, kambe a ndzi nga pfumeli, va ta ndzi lava hinkwako, kambe a va nga ndzi kumi.

²⁹ Va vengile vutivi, va ala ni ku chava HOSI Xikwembu,

³⁰ va nga lavi ku twa nchumu hi switsundzuxo swa mina; minkarhi hinkwayo, a va sandza loko ndzi va laya,

³¹ hikokwalaho, swiendlo swa vona swi ta va xanisa, mano ya vona ma ta va dlayisa.

³² Lava pfumalaka vutivi va tivangela rifu loko va ala ku dyondzisiwa, swiphunta swi ticelela masirha hi ku ka swi nga tikarhateli nchumu.

³³ Kambe loyi a ndzi yingisaka, ú ta tshamiseka, a kuma ku rhula emoyeni, a nga chavi nchumu xo biha.”