Swirilo 5 - BIBELE Mahungu Lamanene

Xikhongelo xo kombela ku tsetseleriwa

¹ We HOSI, tsundzuka leswi swi hi humeleleke; languta, u vona tingana ta hina.

² Ndzhaka ya hina yi nyikiwile vamatiko, miti ya hina yi tekiwile hi swi-ta-swi-famba.

³ Hi hundzukile swisiwana, hi pfumala vatatana, vamana wa hina va kota tinoni.

⁴ Mati lawa hi ma nwaka, ho xava kunene, hambi ti ri tihunyi, hi ti kuma hi mali.

⁵ Vaxanisi va hina va hi tshikelela, va hi khayima; hambi hi karhele, a va hi wisisi.

⁶ Hi tinyiketile eka Vaegipta ni Vaasiriya, leswaku va ta hi pfuna hi swakudya swo ringana.

⁷ Vatata wa hina va dyohile, kambe sweswi a va ha ri kona, kutani hina hi rhwexiwa nandzu wa swidyoho swa vona.

⁸ Hi fumiwa hi mahlonga, ku ri hava loyi a hi kutsulaka emavokweni ya wona.

⁹ Loko hi ya eku singileni ho tisunga, hikuva ku ni swigevenga emananga.

¹⁰ Dyandza ra hi vabyisa, kutani miri wa hina wu hisa ngopfu.

¹¹ Le Siyoni ni le mitini hinkwayo ya tiko ra Yuda, vavasati ni vanhwana va pfinyiwa.

¹² Tihosana ti boheleriwa mavoko ti hayekiwa, vakulukumba a va ha xiximiwi.

¹³ Majaha ma sindzisiwa ku sila mavele, vafana va dedeleka hi matshwinga ya tihunyi.

¹⁴ Vakulukumba a va ha yi ehubyeni, majaha a ma ha chayi swichaya-chayani swa wona.

¹⁵ Ntsako wu herile etimbilwini ta hina, ku cina ka hina ku hundzuke nkosi.

¹⁶ Yóò! Hi le khombyeni, hikuva hi dyohile, kutani harhi ya ntsako yi sukile etinhlokweni ta hina.

¹⁷ Timbilu ta hina ta vava, mahlo ya hina ma tenga-tenga mihloti, hikwalaho ka leswi swi hi humeleleke:

¹⁸ Hi rilela ntshava ya Siyoni leyi onhiweke, laha timhungubye namuntlha ti rhendzelekaka kona.

¹⁹ Kambe we HOSI, ku fuma ka wena hi loku nga heriki, vuhosi bya wena i bya minkarhi hinkwayo.

²⁰ Hikwalaho ka yini u tshamela ku hi rivala, ni ku hi tshika minkarhi hinkwayo xana?

²¹ We HOSI, hi vuyisele eka wena, leswaku hi ta va lava vuyeke eka wena hakunene; hi tlherisele exiyin'weni lexi a hi ri eka xona khale.

²² Xana u nga va u hi tshikele makumu, u nga va u hi hlundzukele hilaha ku nga heriki xana?