Swirilo 4 - BIBELE Mahungu Lamanene

Ku biwa ka Yerusalema ka chavisa

¹ Yóò! Vonani hilaha nsuku wu kurheke hakona, wu lahlekeriwa hi ku tenga ka wona! Maribye layo hlawuleka ma hangalasiwile emahandzeni ya magondzo hinkwawo.

² Majaha yo rhandzeka ya Siyoni a ma ri ni nkoka ku fana ni nsuku lowo saseka, kambe sweswi ma fana ni swibya swa vumba, leswi nga vumbiwaka hi mani na mani.

³ Timhungubye ti hlayisa vana va tona, ti va mamisa, kambe vanhu va ka hina va ni tihanyi ku fana ni tiyimbhu ta le mananga.

⁴ Minkolo ya tinsana yi omile ngopfu hikwalaho ka torha; vana va kongomela swakudya, kambe ku hava loyi a va nyikaka.

⁵ Lava a va tiphina hi ku dya mafurha, sweswi va wa hi ndlala emagondzweni; lava va kurisiweke hi ku ambexiwa swivunguvungu, namuntlha va handza matala.

⁶ Ku biwa ka vanhu va ka hina ku kurile ku tlula ku biwa ka Sodoma, wu nga muti lowu herisiweke hi ku hatlisa, ku nga ri hi voko ra munhu, kambe hi Xikwembu.

⁷ Tihosana ta Yerusalema a ti tengile ku tlula gamboko, ti tsakisa mahlo ku tlula masi; miri wa tona a wu sasekile ku tlula swo bomba ha swona, wu tlhela wu yimeka swinene.

⁸ Kambe namuntlha va hundzukile, va tshwile; munhu a nge va tivi loko o hlangana na vona endleleni; tinyama ta vona ti khanyanile, nhlonge yi khomana ni marhambu, yi omile kukota rihunyi.

⁹ Lava dlayiweke hi tlhari, va katekile ku tlula lava dlayiweke hi ndlala, va nga lava sikeke va ondza hi ku pfumaleka ka swakudya.

¹⁰ Vamanana lava a va tiviwa va ri ni tintswalo, namuntlha va tiswekela vana va vona, va tlhela va dya, hikuva muti wa ka hina wu hlasele hi ndlala.

¹¹ HOSI Xikwembu xi hetisisile makungu ya ku hlundzuka ka xona, xi chulurile ndzilo wa vukari bya xona, wu hisa muti wa Siyoni, wu herisa ni masungulo ya wona.

¹² Vafumi va misava leyi, hambi va ri vaaki va yona hinkwavo, a va kholwanga leswaku valala va nga tshuka va nghenile etinyangweni ta Yerusalema.

¹³ Khombo leri ri vangiwe hi swidyoho swa vaprofeta, ni vubihi bya vaprista va kona, va nga vona lava dlayeke vanhu vo lulama, va halata ngati emutini.

¹⁴ Varhangeri lava, a va gugurhuteka onge va lo fa mahlo, a va lo pyì, hi ngati, lero a swi yila hambi ku ri ku khumba swiambalo swa vona.

¹⁵ Vanhu a va va tlherisa, va ku: “Sukani! Mi thyakile! Sukani, sukani, mi nga hi khumbi!” Kutani va hundzuke vatsendzeleki ni valuveri; hambi va ri vamatiko a va ku: “Vanhu lava va nga ka va nga ha tshami exikarhi ka hina!”

¹⁶ HOSI Xikwembu xi va hangalasile hi xoxe xi nga ha ri na mhaka na vona, vaprista va nga ha fundzhiwi, ni vakulukumba va nga ha xiximiwi.

¹⁷ Mahlo ya hina ma tshamela ku fehla hi ku langutela ku pfuniwa, kambe mupfuni ku hava! Hi tshamile eswihondzweni swa varindzi, hi ri karhi hi langutela ku ponisiwa hi tiko leri nga pfuniki nchumu.

¹⁸ Valala va hi hlota, kutani hi tsandzeka ni ku famba-famba emagondzweni; ku hela ka hina ku tshinele, masiku ya hina ma hela, nkarhi wa ku herisiwa ka hina wu fikile.

¹⁹ Lava va hi hlongorisaka va ni rivilo, va siya ni magama; va hi hlongorisa etintshaveni, va hi tumbelela emananga.

²⁰ Muhlawuriwa wa HOSI Xikwembu, yena mufambisi wa hina, va n'wi khomile ku fana ni xiharhi lexi weleke ekheleni, kasi a hi languterile leswaku ú ta hi sirhelela exikarhi ka vamatiko.

²¹ N'wina va le Edomu lava mi tshameke etikweni ra Usi, mi nga ha tsaka mi hleka, kambe na n'wina mi ta nwisiwa vukari bya HOSI Xikwembu, byi ta mi pyopyisa, mi famba mi nga ambalanga nchumu.

²² N'wina va le Siyoni, ku biwa ka n'wina ku herile, HOSI Xikwembu a xi nga ha mi yisi evukhumbini. Kasi n'wina va le Edomu, xa ha ta mi bela swidyoho swa n'wina, xi humesela milandzu ya n'wina erivaleni.