Swirilo 3 - BIBELE Mahungu Lamanene

Ta munhu loyi a xanisekaka

¹ Ndzi munhu loyi a voneke maxangu, hikuva N'wini wa hinkwaswo ú ndzi bile ngopfu.

² Ú ndzi khayimile a ndzi yisa exinyamini lexo chavisa.

³ Hakunene, siku rin'wana ni rin'wana ú tshamela ku ndzi ba.

⁴ Ú hlakatile miri wa mina hinkwawo, a ndzi tshova ni marhambu.

⁵ Ú ndzi rhendzerile, a ndzi phutsela hi mbitsi ni nhlomulo;

⁶ ú ndzi tshamisisile exinyamini, ku fana ni vanhu lava feke khale.

⁷ Ú ndzi pfalerile ekhotsweni leswaku ndzi nga baleki, a ndzi bona hi tinketani leto tiya.

⁸ Hambiloko ndzi huwelela ndzi kombela ku pfuniwa, a nga yingisi xikhongelo xa mina.

⁹ Ú ndzi pfalela tindlela hi maribye lamakulu, a gombonyokisa budula ra mina.

¹⁰ Eka mina ú fana ni xinkankanka lexi xi ndzi bvutameleke, onge i nghala leyi yi ndzi tumbeleleke.

¹¹ Ú ndzi pfalerile tindlela, a ndzi handzulela, a ndzi siya ndzi nga ha pfuni nchumu.

¹² Ú kongile vurha bya yena, a ndzi copa hi nseve.

¹³ Ú hlomurile miseve enkotlotweni wa yena, a ndzi tlhava mbilu ha yona.

¹⁴ Ndzi hundzukile xihlekiso exikarhi ka va ka hina hinkwavo, siku hinkwaro va ndzi hlekula hi tinsimu.

¹⁵ Ú ndzi dyisa leswo bava ndzi ko ndzi hlamba timbilu, a ndzi nwisa nyongwa ndzi kala ndzi hlanta.

¹⁶ Ú ndzi wiserile etaleni, ndzi funya nkuma;

¹⁷ ú ndzi pfumata ku rhula emoyeni, ndzi rivele ni leswaku ku tsaka swi vula yini!

¹⁸ Sweswi ndzi ri, a ndza ha hanyeli nchumu, a ndza ha ri na leswi ndzi nga swi langutelaka eka HOSI Xikwembu.

¹⁹ Loko ndzi tsundzuka nhlomulo ni ku pepetseka ka mina, onge ndzo nwisiwa nyongwa leyi bavaka.

²⁰ Ndzi tshama ndzi ri karhi ndzi swi tsundzuka, kutani swi ndzi heta matimba.

²¹ Kambe swi kona swin'wana leswi ndzi swi langutelaka, leswi ndzi swi tshembaka, swi nga leswi:

²² Rirhandzu ra HOSI Xikwembu a ri heli, tintswalo ta xona a ti na makumu;

²³ ti vonaka ti ri tintshwa siku rin'wana ni rin'wana. Ku tshembeka ka wena HOSI, i kukulu!

²⁴ Ndzi vula sweswo ndzi ri: HOSI Xikwembu i ndzhaka ya mina, hikokwalaho ndzi veka ku tshemba ka mina eka xona.

²⁵ HOSI Xikwembu xi ni vunene eka lava va xi tshembaka, eka vanhu lava va xi lavaka.

²⁶ Hikokwalaho swi sasekile loko munhu a lehisa mbilu, a langutela leswaku HOSI Xikwembu xi n'wi ponisa.

²⁷ I mhaka leyinene loko munhu a dyondza ku rhwala maxangu a ha ri lontshwa.

²⁸ Munhu loyi Xikwembu xi n'wi rhwexeke maxangu, a a tikhome a tiyisela;

²⁹ a a titsongahate swinene, kumbexana a nga ha nyikiwa ku tshemba;

³⁰ a a kangatele rhama eka loyi a n'wi baka, a amukela ni ku rhukaniwa.

³¹ N'wini wa hinkwaswo a nge tshiki munhu a n'wi tshikela makumu;

³² hambiloko a tisela munhu ku vaviseka, wa ha ta n'wi tsetselela hikwalaho ka rirhandzu ra yena lerikulu, ro tshembeka;

³³ a nga swi tsakeli ku tsongahata vanhu, kumbe ku va tisela makhombo.

³⁴ Ku rahetela mubohiwa un'wana ni un'wana laha tikweni,

³⁵ ni ku bakanyela etlhelo tifanelo ta munhu emahlweni ka Loyi a nga henhla-henhla,

³⁶ ni ku gombonyokisa mhaka ya yena ehubyeni, N'wini wa hinkwaswo a nga lavi ni ku swi vona!

³⁷ Loko N'wini wa hinkwaswo a nga lerisanga nchumu, xana i mani loyi a nga vulaka rito, kutani swilo swi humelela, xana?

³⁸ Minkateko ni makhombo a swi humeleli, loko Loyi a nga henhla-henhla a nga lerisanga.

³⁹ Xana munhu ú vilelela yini loko a beriwa swidyoho swa yena, kambe a nga tekeriwanga vutomi xana?

⁴⁰ A hi tikambeni, hi xiyaxiya tindlela ta hina, kutani hi tlhelela eka HOSI Xikwembu.

⁴¹ A hi tlakuseni mavoko, hi khongela Xikwembu xa le matilweni hi timbilu ta hina hinkwato, hi ku:

⁴² “Hi tiarisile hi ku dyohela we HOSI, kutani a wu hi rivalelanga.

⁴³ “Eku hlundzukeni ka wena, u hi tumbelerile, u hi hlongorisa ni ku hi dlayetela u nga tsetseleli.

⁴⁴ U tifihlile hi papa leswaku swikhongelo swi nga ha ku fikeli.

⁴⁵ Exikarhi ka vamatiko, u hi hundzurile thyaka ra le taleni.

⁴⁶ “Valala va hina hinkwavo va hi hlekula,

⁴⁷ va hi chavisa, va hi phasa, va hi heta ni ku hi lovisa;

⁴⁸ mahlo ya mina ma halata mihloti onge i nambu, hikwalaho ka ku lovisiwa ka vanhu va ka hina.

⁴⁹ “Mihloti ya mina yi ta halaka vusiku ni nhlekanhi, yi nga yimi,

⁵⁰ ku kondza loko HOSI Xikwembu xi languta xi ri etilweni, xi swi vona:

⁵¹ Mahlo ya mina ma fehla, loko ndzi vona leswi humelelaka vanhu va muti wa ka hina.

⁵² “Valala va mina va ndzi hlotile onge ndzi xinyanyana, kasi a ndzi na nandzu.

⁵³ Va ndzi wiserile ekheleni ndza ha hanya, va tlhela va ndzi hoxetela hi maribye.

⁵⁴ Ndzi mbombomerile ematini, kutani ndzi ku: ‘Yóò, ndzi lovile!’

⁵⁵ “We HOSI, ndzi huwelerile eka wena ndzi ri ehansi ekheleni.

⁵⁶ U twile xikombelo xa mina loko ndzi te: ‘U nga ali ku twa ku konya ka mina, loko ndzi kombela ku pfuniwa.’

⁵⁷ Siku ndzi ku vitaneke, u tile kusuhi na mina, u ku: ‘U nga chavi!’

⁵⁸ “We N'wini wa hinkwaswo, u yima na mina, u biyelerile vutomi bya mina.

⁵⁹ U vonile hilaha ndzi dyoheriwaka hakona we HOSI. Avanyisa timhaka ta mina!

⁶⁰ Makungu ya vona hinkwawo ya ku tirihisela ni ku lwa na mina, u ma vonile.

⁶¹ “We HOSI, u twile loko va ndzi hlekula, u vonile ni makungu ya vona hinkwawo ya ku lwa na mina.

⁶² Marito ni ku lumbeta ka lava va ndzi vengaka, swa ndzi xanisa masiku hinkwawo.

⁶³ Languta! Hambi va tshamile kumbe va yimile, va le ku ndzi hlekuleni hi tinsimu.

⁶⁴ “We HOSI, bana vanhu lava hi ku ya hi leswi va ndzi endleke swona;

⁶⁵ tlanyarisa timbilu ta vona, u va fularhela;

⁶⁶ we HOSI, va hlundzukele u va hlongorisa, u va herisa, va nyamalala laha misaveni.”