Swirilo 1 - BIBELE Mahungu Lamanene

Mahlomulo ya Yerusalema

¹ Yóò, xivundza lexi nga ni muti lowu, wona lowu khale a wu tele hi vanhu! Muti lowu a wu ri wukulu eka tinxaka hinkwato, sweswi wu hundzukile, wu fana ni noni; wona lowu a wu dumile ematikweni, namuntlha wu endliwe hlonga.

² Nivusiku Yerusalema ú rila hi xiviti, mihloti yi xiririka emarhameni. Exikarhi ka lava khale a a rhandzana na vona, ku pfumaleka ni un'we wo n'wi miyeta; hinkwavo lava khale a va ri vanghana va yena, namuntlha va hundzuke valala eka yena, va n'wi xisa.

³ Yuda ú yisiwile evukhumbini, emaxangwini ni le ku vavisekeni lokukulu; sweswi ú hanya exikarhi ka vamatiko, a nga kumi laha a nga tshamisekaka kona; lava va n'wi hlongorisaka, va n'wi kumile, a nga ha koti ku phonyoka.

⁴ Magondzo lama yaka eSiyoni ma rila, hikuva ku pfumaleka ni un'we wo ta eminkhubyeni. Tinyangwa ta Yerusalema a ta ha pfhumbi, vaprista va kona va konya; vanhwana na vona va xanisiwa: Nhlomulo wa muti lowu a hi ku kula ka wona!

⁵ Valala va wona va wu hlurile; vona lava va wu vengaka, va kateka. HOSI Xikwembu xi wu tisele maxangu lawa hikwalaho ka ku tala ka swidyoho swa wona; vana va wona va khomiwile hi valala, va hundzuka mahlonga.

⁶ Vukosi hinkwabyo byi sukile eSiyoni, wona muti wo saseka. Tihosana ta wona sweswi ti fana ni timbavala leti pfumalaka madyelo: Ti tsutsuma lava va ti hlongorisaka, ti nga ri na matimba.

⁷ Enkarhini lowu wa mahlomulo ni wa ku pepetseka ka yena, Yerusalema ú tsundzuka swilo swa yena hinkwaswo swa nkoka leswi a a ri na swona ku sukela khale. Loko vanhu va yena va wele emavokweni ya valala, ku pfumaleke ni un'we wa ku n'wi pfuna; valala va n'wi langutile, va n'wi hlekula, va tsakela ku wa ka yena.

⁸ Yerusalema ú dyohile ngopfu, hikokwalaho ú tole thyaka; hinkwavo lava khale a va n'wi xixima, namuntlha va n'wi sandza, hikuva va n'wi vona a nga ambalanga nchumu. Hambi yena hi yexe wa konya, a tlhela a languta hansi.

⁹ Thyaka ra yena a ri ri etingubyeni, kambe a nga anakanyanga leswaku ú ta avanyisiwa; hikokwalaho ku wa ka yena ka chavisa, ú pfumala ni loyi a n'wi tiyisaka. Yerusalema ú ri: “We HOSI, vona nhlomulo wa mina, hikuva nala wa khana, ú hlurile.”

¹⁰ Valala va n'wi tekerile swilo swa yena hinkwaswo swa nkoka; ú vonile vamatiko va ya nghena exivandleni xa yena lexo hlawuleka, lexi we HOSI a wu nga va pfumeleli ku ya nghena eka xona.

¹¹ Hinkwavo vanhu va yena va konya loko va ri karhi va lava swakudya; va tilavela swona hi ku xavisa swilo swa vona swa nkoka, va ta kuma matimba hi vuntshwa. Yerusalema ú ri: “Languta we HOSI, u vona hilaha ndzi soriwaka hakona.

¹² “N'wina hinkwenu vahundzi va ndlela, xana swilo leswi a swi vuli nchumu eka n'wina xana? Xiyaxiyani mi vona loko ku ri ni munhu la nga ni nhlomulo wo fana ni wa mina, lowu HOSI yi ndzi vangeleke wona siku leri yi ndzi hlundzukeleke ha rona.

¹³ “Yi rhumerile ndzilo wu ta hi le henhla, yi wu rhelerisa wu nghena emarhambyini ya mina. Yi ndzi rhiyile hi ntlhamu, yi ndzi wisa ndzi ku gáá; yi ndzi siyile ndzi ri rhumbi, ku ri hava siku leri ndzi tsakaka.

¹⁴ “N'wini wa hinkwaswo ú bohelerile swidyoho swa mina hi voko ra yena, swi hundzuka joko, a ri tlhandleka enhan'wini ya mina, a ndzi heta matimba; a ndzi nyiketa emavokweni ya lava ndzi va chavaka.

¹⁵ “N'wini wa hinkwaswo ú fularherile tinhenha ta mina hinkwato ndzi ri karhi ndzi swi vona. Ú rhambile ntshungu ku ta lwa na mina, leswaku wu fayetela majaha ya mina. Mina Yerusalema nhwana wa Yuda, ú ndzi pyanyile kukota mihandzu ya vhinya exikhuvutelweni.

¹⁶ “Timhaka leti ti ndzi vavisa mbilu, mahlo ya mina ma xiririka mihloti, hikuva loyi a ndzi tiyisaka, loyi a a ta ndzi nyika matimba, ú le kule na mina. Vana va mina va le ku vavisekeni, hikuva nala ú ndzi hlurile.”

¹⁷ Siyoni ú tshambulute mavoko a khongela, kambe ku pfumaleka ni un'we wo n'wi tiyisa. HOSI Xikwembu xi lerisile valala va Yakobo ku n'wi rhendzela hi matlhelo hinkwawo. Yerusalema ú hundzukile xitlakati xo nyenyetsa exikarhi ka vona.

¹⁸ “HOSI yi lulamile, a yi hoxanga: Nandzu wu na mina ndzi nga tlula ku lerisa ka yona. N'wina vanhu hinkwenu, yingisani, mi languta ni maxangu ya mina. Vanhwana va mina ni majaha ya mina va yisiwile evukhumbini.

¹⁹ “Ndzi vitanile lava khale a ndzi rhandzana na vona, kambe a va pfumelanga; vaprista ni vakulukumba va mina va lovele mutini, loko va ri karhi va lava swakudya leswaku va ta kuma matimba.

²⁰ “We HOSI, ndzi langute, hikuva ndzi le maxangwini, moya wa mina wu le ku karhatekeni; ndzi le ku vavisekeni lokukulu, hikuva ndzi tiarisile ngopfu. Ehandle, vana va mina va dlawa hi tlhari, etindlwini, va fa hi ntungu.

²¹ “Yingisa ku konya ka mina: Ndzi pfumala loyi a nga ndzi tiyisaka. Valala va mina hinkwavo va twile ta nhlomulo wa mina, kutani va tsaka hi leswi u ndzi endlaka swona; kambe we HOSI, hatlisa u tisa siku leri u ri vuleke, leswaku na vona va ta biwa kukota mina.

²² “Humesela ku biha ka vona hinkwako erivaleni; u va ba kukota leswi u ndzi biseke swona, hikwalaho ka swidyoho swa mina hinkwaswo. Ku konya ka mina i kukulu, ni mbilu ya mina yi vava ngopfu.”