Sofoniya 2 - BIBELE Mahungu Lamanene

Nkarhinyana wo hundzuka wa ha ri kona

¹ Hlengeletanani endhawini yin'we, n'wina vanhu lava pfumalaka tingana,

² mi nga si hlongoriwa, mi nyamalala kukota mungu, mi nga si hisiwa hi vukari lebyi pfurhaka bya HOSI Xikwembu, siku ra ku kariha ka xona ri nga si mi fikela.

³ Lavani HOSI Xikwembu, n'wina hinkwenu lava titsongahataka, n'wina mi endlaka ku rhandza ka xona; lavani leswo lulama, mi va ni xichavo, kumbe xana mi ta pona esikwini ra ku kariha ka HOSI.

Vamatiko lava vandzakaneke na Vaisraele va ta herisiwa

⁴ Muti wa Gaza wu ta sala wu nga ri na munhu, ni wa Axikeloni wu ta hundzuka rhumbi; va le Axidodo va ta hlongoriwa, dyambu ri lo hosi! Va le Ekroni va ta rhurhisiwa.

⁵ Mi ni khombo n'wina mi akeke eribuweni ra lwandle, n'wina va rixaka ra Vakereti! Rito ra HOSI Xikwembu ri kanetana na n'wina, n'wina va tiko ra Vafilista; Xikwembu xi ta mi herisa, ku nga sali na un'we wa mhamba.

⁶ Tiko ra n'wina ra le ribuweni ra lwandle ri ta hundzuka madyelo ya swifuwo, ri va puwa ro risela kona tinyimpfu, ni ndhawu ya swivala swa tona.

⁷ Tiko leri ri ta tekiwa hi va le Yuda lava poneke; va ta risela kona swifuwo swa vona; namadyambu va ta ya etlela etindlwini ta le Axikeloni, hikuva HOSI Xikwembu xa vona xi ta va tsetselela, xi tlhela xi va katekisa.

⁸ HOSI Xikwembu xi ri: “Vamowabu, ndzi va twile loko va sandza, ni ku rhuketela ka Vaamoni ku fikile etindleveni ta mina, ndzi va twile loko va hlekula vanhu va mina, va tibumabuma, va ku va ta teka tiko ra Israele.

⁹ Kambe mina HOSI ya matimba hinkwawo, Xikwembu xa Israele, ndza hanya: Va le Mowabu ni va le Amoni va ta endliwa leswi endliweke va le Sodoma na Gomora; tiko ra vona ri ta tala mahlwehlwe, ni makhele ya munyu; ri ta onhakela makumu. Masalela ya Vaisraele, vona lava poneke, hi vona lava nga ta hlasela Vamowabu na Vaamoni, va va tekela tiko.”

¹⁰ Leyi hi yona hakelo ya ku tikurisa ka vona, hikuva va sandzile ni ku rhuketela vanhu va HOSI ya matimba hinkwawo.

¹¹ HOSI Xikwembu xi ta va ba hi ndlela yo chavisa, swikwembu hinkwaswo leswi nga misaveni, xi ta swi tsongahata, kutani vanhu va tinxaka hinkwato va ta xi nkhinsamela ematikweni ya vona.

¹² Na n'wina va le Etiyopiya, mi ta heta hi fumu ra HOSI Xikwembu!

¹³ HOSI Xikwembu xi ta tlakusa voko, xi ba matiko ya le n'walungwini, xi herisa ni tiko ra Vaasiriya; muti wa Ninivha, xi ta wu hundzula rhumbi, wu va mananga lama omeke ngopfu.

¹⁴ Mintlhambi ya swifuwo, ni swiharhi swa nhova hi tinxaka-xaka ta swona swi ta vundza emutini lowu; makoti ni swihloni swi ta tshama exikarhi ka tiphuphu leti weleke hansi, swinkhovha swi ta rila swi tshamile emafasitereni, mawukuwuku ma ta rila ma ri eswihukuveni, timhandze ta kedari leti akeke muti wa kona ti ta sala erivaleni.

¹⁵ Lowu i muti lowu a wu tikurisa ngopfu, wu titwa wu hlayisekile; vaaki va wona a va hamba va ku: “Hina hi hina, a ku na van'wana!” Kambe sweswi wu hundzukile rhumbi ro chavisa, ni kaya ra swiharhi swa nhova; hinkwavo lava hundzaka hi ndlela, va wu hlekula, va hlakahla tinhloko.