Sofoniya 1 - BIBELE Mahungu Lamanene

Manghenelo

¹ Lawa i marito lawa HOSI Xikwembu xi ma rhwexeke Sofoniya n'wana Kuxi wa Gedaliya, wa Amariya, wa Hezekiya, eminkarhini leyi Yosiyasi n'wana Amoni a a ri hosi ya Yuda.

Ta siku ro chavisa ra Xikwembu

² HOSI Xikwembu xi vula sweswo, xi ri: “Swilo hinkwaswo leswi nga la misaveni, ndzi ta swi herisela makumu.

³ Ndzi ta herisa vanhu ni swiharhi, ndzi herisa tinyanyana ni tinhlampfi. Vanhu lavo homboloka, ndzi ta va wisela hansi; ndzi ta dlayetela vanhu hinkwavo laha misaveni; ndzi vurisa sweswo, mina HOSI.

⁴ “Ndzi ta tlakusa voko ra mina, ndzi ba vanhu va le Yuda, ni vaaki hinkwavo va muti wa Yerusalema; leswi saleke swa vukhongeri bya Baali, ndzi ta swi herisa exivandleni xexo, ndzi herisa ni vaprista va kona.

⁵ Ndzi ta ba lava khandziyaka emalwangwini ya tindlu, va ya gandzela dyambu ni n'weti ni tinyeleti; ndzi ta ba lava khongelaka mina HOSI, kasi hi tlhelo va hlambanya hi vito ra xikwembu lexi va nge i Milikomo.

⁶ Ndzi ta ba lava va ndzi fularhelaka mina HOSI, vona lava va nga ndzi laviki, lava nga rhandziki ku vutisa nchumu eka mina.”

⁷ Miyelani emahlweni ka HOSI N'wini wa hinkwaswo, hikuva siku ra yena ri le kusuhi; ú lulamisile magandzelo, a hlawulekisa ni lava a va rhambeke.

⁸ Hi siku ra magandzelo ya kona, HOSI Xikwembu xi ri: “Ndzi ta ba tindhuna ni vana va tihosi, ni hinkwavo lava tekelelaka mikhuva ya vanhu vambe.

⁹ Hi siku rero, ndzi ta ba hinkwavo lava chavaka ku khandziya xihukuva xa yindlu ya n'wini wa vona, kambe va nga chavi ku nghenisa endlwini leyi leswi va swi kumeke hi tihanyi ni vuxisi.”

¹⁰ HOSI Xikwembu xi vula sweswo, xi ri: “Esikwini rero, huwa yi ta twala eYerusalema hi tlhelo ra Nyangwa-ya-Tinhlampfi; laha ku vuriwaka ‘Ndhawu Leyintshwa’, va ta tlhava mukhosi, eswitsungeni ku ta twala mpfumawulo lowukulu wa tinyimpi.

¹¹ N'wina vaaki va le nkoveni, rilani, hikuva ntlawa wa van'wamabindzu a wa ha ri kona, ni hinkwavo lava xavisaka silivhere, va herisiwile.

¹² Enkarhini lowu, ndzi ta teka rivoni ndzi lavisisa hinkwako emutini wa Yerusalema, ndzi ko ndzi kuma lava titshembaka, lava tshamaka va xurhile vhinyo, lava vulavulaka va ku: ‘HOSI Xikwembu xi nge endli nchumu, xo biha kumbe xo saseka!’

¹³ Kambe rifuwo ra vona ri ta phanghiwa, tindlu ta vona ti ta biwa ti wa; hambi va nga aka tindlu, va nge tshami ka tona, hambi va nga rima masimu ya vhinya, vhinyo ya kona va nge yi nwi.”

¹⁴ Siku lerikulu ra HOSI Xikwembu ra ta, ra tshinela, ri ta hi ku hatlisa; mpfumawulo wa rona wa chavisa, hambi yi ri nhenha, yi ta ba nyandayeyo.

¹⁵ Siku rero ri ta va ra vukari, ra makhombo ni ku xaniseka, ra ku mbundzumuxela ni ku herisa; ri ta va ni munyama, ri to khwìxìì, siku ra mapapa yo chavisa ni hunguva.

¹⁶ Esikwini rero, ku ta twala mhalamhala, masocha ma ta vitanana, ma hlasela makhokholo layo tiya ni swihondzo leswo leha.

¹⁷ HOSI Xikwembu xi ri: “Vanhu, ndzi ta va vangela maxangu, va ta famba, onge va lo fa mahlo, ngati ya vona yi ta halateriwa ehansi, ni mintsumbu ya vona yi ta cukumetiwa etaleni, hikuva va ndzi dyoherile mina HOSI.”

¹⁸ Esikwini leri HOSI Xikwembu xi nga ta karihela vanhu, silivhere ya vona ni nsuku wa vona swi nge va ponisi; ndzilo wa rilondzo ra xona wu ta herisa misava hinkwayo; vaaki va yona hinkwavo va ta lovisiwa hi ku copeta ka tihlo.