Risimu ra Tinsimu 8 - BIBELE Mahungu Lamanene

¹ Loko a wo va makwerhu loyi hi nga lo mama vele rin'we, a ndzi to na hlangana na wena ehandle, ndzi ku ntswontswa, ku nga ri na munhu loyi a nga ta ndzi sola.

² A ndzi ta ku teka, ndzi ku yisa endlwini ya manana, yena loyi a ndzi kombeke misava. A ndzi ta ku nyika vhinyo leyo tsokombela, u nwa, ni dzova ra magrenada.

³ Onge voko ra wena ra ximatsi ri nga va exikosini xa mina, lera xinene rona ri nga ndzi singarhela!

⁴ N'we vanhwana va Yerusalema, ndzi hlambanyeleni hi timhala ni timbavala, leswaku mi nge pfuxi murhandziwa wa mina a nga si swi rhandza.

Tinxangwana

⁵ I mani loyi a taka hi tlhelo ra le mananga, a vukarhile murhandziwa wa yena? Ndzi ku pfuxile ehansi ka murhi wa muapula, laha mana wa wena a a lumiwa a ri kona enkarhini wa ku velekiwa ka wena, laha loyi a ku kombeke misava a a lumiwa a ri kona.

Jaha

⁶ Ndzi veke embilwini ya wena, ndzi va mfungho kona, u tlhela u ndzi endla mfungho wa voko ra wena, hikuva rirhandzu ri ni matimba ku fana ni rifu, ku navela ku ni tihanyi tanihi hi sirha. Malangavi ya kona i ndzilo lowu vuvumelaka, lowu hisaka swinene.

⁷ Mati hambi ma tarisile ku yini, ma nge ri timi rirhandzu, hambi yi ri ndhambi, yi nge ri khukhuli. Hambiloko wanuna a nga ringeta ku xava rirhandzu hi rifuwo ra yindlu ya yena hinkwaro, makumo ya kona ku to va ku soriwa ntsena.

Tinxangwana

⁸ Hi ni makwerhu loyi a ha riki ntsongo, loyi a nga si thugaka mavele; xana hi ta endla yini hi yena, loko o tshuka a vulavurisiwile?

⁹ Loko o va khumbi, a hi ta aka xihondzo xa silivhere ehenhla ka yena, loko o va rivanti, a hi ta n'wi sirhelela hi mapulangi ya kedari.

Nhwana

¹⁰ Mina ndzi khumbi, ni mavele ya mina i swihondzo swa rona, kutani eka yena, ndzi munhu loyi a tisaka ku rhula.

Jaha

¹¹ Solomoni a a ri ni nsimu ya vhinya eBaala-Hamoni, leyi a a yi vekile emavokweni ya varindzi, un'wana ni un'wana wa vona a a fanele ku hakela mihandzu ya kona hi tisilivhere ta 1 000.

¹² Wena Solomoni, u nga ha va ni tisilivhere ta 1 000, varindzi va mihandzu vona va kuma 200; loko yi ri leya ka mina nsimu ya vhinya, ndzi ta tihlayisela yona hi ndzexe.

¹³ Wena u tshamaka entangeni wa mina, vanghana va mina va lava ku twa rito ra wena, na mina ndza swi lava ku ri twa.

Nhwana

¹⁴ Hatlisa murhandziwa, tana ku fana ni mhala kumbe mbavala, etintshaveni ta mirhi ya swinun'hweriso.