Risimu ra Tinsimu 7 - BIBELE Mahungu Lamanene

¹ Loko u ambele tintanghu, we nhwana, ú fana ni nkosikazi, milenge ya wena a hi ku saseka ka yona. Tinyonga ta wena ti vumbekile ku fana ni maribye layo xonga, lama vatliweke hi loyi a swi kotaka.

² Nkava wa wena i xinkambana xa xirhendzewutana, lexi tshamaka xi ri ni vhinyo leyo nandziha. Khwiri ra wena i nhulu ya koroni leyi rhendzeriweke hi swiluva.

³ Mavele ya wena hi vumbirhi bya wona ma fana ni swimbavalana swimbirhi, leswi tswariweke siku rin'we.

⁴ Nhamu ya wena yi fana ni khokholo leri akiweke hi matino ya ndlopfu. Mahlo ya wena i mativa ya le Hexiboni lama nga kusuhi ni nyangwa ya Beta-Rabimi. Nhompfu ya wena yona yi fana ni xihondzo xa Lebanoni, lexi langutaneke ni muti wa Damaska.

⁵ Nhloko ya wena yi fana ni ntshava ya Karmele, misisi ya wena yona yi vangama kukota xivunguvungu; hambi yi ri hosi yi nga phasiwa hi ku saseka ka yona.

⁶ U xongile, u tlhela u tsakisa, wena murhandziwa, xitsakisi!

⁷ U yimekile ku fana ni ncindzu, mavele ya wena ma fana ni swichocho swa ncindzu.

⁸ Ndzi vula tano, ndzi ri: Murhi wa ncindzu ndzi ta wu khandziya ndzi khomelela marhavi ya wona. Onge mavele ya wena ma nga fana ni swichocho swa vhinya, ni loko moya lowu u wu hefemulaka wu nga nun'hwela kukota maapula.

⁹ Onge ku ntswontswa ka wena ku nga fana ni vhinyo leyo tsokombela leyi rhelelaka khwatsi emilon'weni ni le menweni.

Nhwana

¹⁰ Mina ndzo va wa murhandziwa, na yena ú navela mina ntsena.

¹¹ Murhandziwa, tana, a hi ye enhoveni, hi ya etlela eswigungwanini.

¹² Hi ta vindzuka, hi ya emasin'wini ya vhinya, hi ya vona loko vhinya yi hlukile, ni loko yi sungule ku tswala, ni loko mirhi ya magrenada yi balekile swiluva. Kona kwale, ndzi ta ku nyika rirhandzu ra mina.

¹³ Marhanga ya rirhandzu ma humesa ku nun'hwela, etinyangweni hinkwato ta hina ku ni mihandzu ya tinxaka-xaka, leyo cindzuka ni leyo vupfa, leyi ndzi yi vekeleke wena, murhandziwa wanga.