Risimu ra Tinsimu 6 - BIBELE Mahungu Lamanene

Tinxangwana

¹ Xana murhandziwa wa wena ú ye kwihi, wena mbhurhi ya timbhurhi? Xana murhandziwa wa wena ú ye tlhelo rihi, hi ta ku lavisa yena, xana?

Nhwana

² Murhandziwa wa mina ú rhelele entangeni wa yena, laha ku byariweke swinun'hweriso, a ya risela kona ntlhambi wa yena, ni ku hlengeleta swiluva.

³ Mina ndzi wa murhandziwa wa mina, na yena i wa mina, yena la riselaka exikarhi ka swiluva.

Jaha

⁴ We murhandziwa u sasekile ku fana ni muti wa Tirisa, u vumbekile ku fana ni muti wa Yerusalema, u hlamarisa ku fana ni masocha lama khomeke mijeko.

⁵ U nga ndzi languti, hikuva mahlo ya wena ma ndzi heta matimba. Misisi ya wena yi fana ni ntlhambi wa timbuti, leti rhelelaka ti suka entshaveni ya Giliyadi.

⁶ Meno ya wena ma vangama ku fana ni tinyimpfu leta ha ku hlambisiwaka, leti tswalaka ha swimbirhi-mbirhi, ni yin'we ya tona a yi fisi.

⁷ Marhama ya wena endzeni ka nturhu ma fana ni magrenada.

⁸ Ku nga ha va ni tinkosikazi ta 60, ni vasati lavatsongo va 80, ni vanhwana va ntsandza-vahlayi,

⁹ kambe mina ndzi tirhandzela ntsena xituvana xa mina, lexi hetisekeke, lexi ngo va xoxe eka mana wa xona, lexi mana wa xona a xi tivaka xi nga ri na xivati. Loko vanhwana va n'wi vona, va n'wi vula la katekeke, tinkosikazi ni vasati lavatsongo va n'wi dzunisa, va ku:

¹⁰ “Loyi i mani, wa langutelo ro fana ni vurhonga, wo xonga onge i n'weti, wo vangama tanihi dyambu, wo hlamarisa ku fana ni masocha lama khomeke mijeko?”

¹¹ Ndzi rhelerile ndzi ya entangeni wa le minkanyini ku ya hlalela swiluva swa le nkoveni, ni ku vona loko vhinya yi hlukile, ni loko mirhi ya magrenada yi balekile swiluva.

¹² Loko ndzi nga si anakanya nchumu, miehleketo ya mina yi ndzi teka, yi ndzi veka ekalichini etlhelo ka hosi ya ka hina.

Tinxangwana

¹³ Cina, cina we Muxulama, cina hi ku vona! Xana mi lavela yini ku vona Muxulama, loko a ri karhi a cina exikarhi ka vahlaleri, xana?