Risimu ra Tinsimu 5 - BIBELE Mahungu Lamanene

Jaha

¹ Ndzi ta entangeni wa mina, murhandziwa, we nhwana wanga, ndzi ta hlengeleta mafurha ya mirha ni swinun'hweriso swa mina, ndzi dya swihlenge swa mina ni vulombe bya swona, ndzi nwa vhinyo ya mina ni ntswamba wa mina. N'wina vanakulorhi, dyanani mi nwa, nwanani mi kolwa, n'we vanghana.

Nhwana

² A ndzi etlele, kambe mbilu a yi nga ri kona evurhongweni. Ndzi twa ku gongondza ka murhandziwa: Ú ri: “Ndzi pfulele murhandziwa, we xiluva xanga, wena xituvana xa mina lexi hetisekeke, hikuva nhloko ya mina yi tsakamile hi mberha, misisi ya mina yi thoneriwile hi mathonsi ya vusiku.”

³ Mina ndzi ku: “Ndzi hluvurile, xana ndzi fanele ku tlhela ndzi ambala ke? Ni milenge, ndzi hlambile, xana ndzi fanele ku tlhela ndzi yi thyakisa ke?”

⁴ Hiloko murhandziwa wa mina a khoma rivanti, mbilu ya mina yi khapa hi ntsako,

⁵ kutani ndzi pfuka, ndzi ya pfulela murhandziwa wa mina. Loko ndzi khoma rivanti, swandla swa mina swi thona-thona mafurha ya mirha, lama nga tintihweni wona ma xiririka kunene.

⁶ Ndzi pfulela murhandziwa wa mina, kambe a a sukile a famba. Loko a hundzuluka a ndzi komba xikosi, ndzi helela hi matimba. Ndzi n'wi lavile, kambe a ndzi n'wi kumanga, ndzi n'wi vitanile, kambe a nga pfumelanga.

⁷ Ndzi hlanganile ni varindzi, loko va ri karhi va rhendzeleka ni muti, va ndzi ba, va ndzi vavisa, va ndzi tekela ni nceka wa mina.

⁸ N'wina vanhwanyana va Yerusalema, ndza mi kombela, loko mi kuma murhandziwa wanga, n'wi byeleni leswaku rirhandzu ra mina eka yena, ra ndzi vabyisa.

Tinxangwana

⁹ Leswi u ngo kala u hi kombela hi ndlela leyi, xana murhandziwa wa wena wo tlula varhandziwa va van'wana xana? Wena mbhurhi ya timbhurhi, xana murhandziwa wa wena ú tlula van'wana hi yini?

Nhwana

¹⁰ Murhandziwa wa mina ú yimekile, a tlhela a saseka, ú hlawulekile exikarhi ka madzana-dzana.

¹¹ Nhloko ya yena i nsuku lowu tengeke, misisi ya yena yi songekile, yi ni ntima wa wukuwuku.

¹² Mahlo ya yena ma fana ni ya matuva etlhelo ka swihlovo swa mati, matuva lama tlhambukeriweke hi ntswamba, ma tshamisekile hi fanelo.

¹³ Tinhlaya ta yena ti fana ni ntanga wa swinun'hweriso leswi humesaka ku nun'hwela ko tsakisa. Milomo ya yena i swiluva leswi ntontaka mafurha ya mirha.

¹⁴ Mavoko ya yena i nsuku lowu vumbekeke, lowu sasekisiweke hi maribye ya nkoka. Miri wa yena wu rhetela ku fana ni matino ya ndlopfu, lama nameketiweke maribye ya nkoka ya safiri.

¹⁵ Milenge ya yena i tiphuphu ta maribye yo rhetela, leti tlhomiweke eminkotlotweni ya nsuku. Xivumbeko xa yena xi fana ni ntshava ya Lebanoni, xi hlawulekile ku fana ni mirhi ya Kedari.

¹⁶ Ku vulavula ka yena ku tsokombela ngopfu, vuyena byakwe hinkwabyo bya rhandzeka swinene. N'wina vanhwanyana va Yerusalema, loyi hi yena murhandziwa wa mina, yena munghana wanga.