Risimu ra Tinsimu 4 - BIBELE Mahungu Lamanene

Jaha

¹ Murhandziwa, u mpama, wo va mbhurhi ya ku vatlwa; endzeni ka nturhu, mahlo ya wena ma fana ni ya matuva; misisi ya wena yi fana ni ntlhambi wa timbuti leti rhelelaka ti suka entshaveni ya Giliyadi.

² Meno ya wena ma vangama ku fana ni tinyimpfu leta ha ku tsemetiwaka voya, ti hlambisiwa, leti tswalaka ha swimbirhi-mbirhi, ni yin'we ya tona a yi fisi.

³ Milomo ya wena ya ku fanela, ni xinon'wana xa wena xi vumbekile. Marhama ya wena endzeni ka nturhu ma fana ni magrenada mambirhi.

⁴ Xinhan'wana xa wena onge i xihondzo xa Davhida lexi akiweke hi maribye, laha ku hayekiwaka switlhangu swa madzana-dzana, hinkwaswo swi ri swa tinghwazi.

⁵ Mavele ya wena hi vumbirhi bya wona ma fana ni swimbavalana swimbirhi leswi tswariweke siku rin'we, swi dyelaka exikarhi ka swiluva.

⁶ Ndzi ta titshamela entshaveni ya mirhi ya mirha, ni le xitsungeni xa mirhi ya risuna, vurhonga byi ko byi tshwuka, ni dyambu ri ko ri tlhava.

⁷ Murhandziwa, u xongile swinene, a xi kona lexi solekaka eka wena.

⁸ Suka la Lebanoni, hi famba swin'we, wena nhwana wa mina, a hi fambe swin'we hi suka laha Lebanoni. Sukela nhlohlorhi ya ntshava ya Amana, ni ya Seniri ni ya Hermoni, u huma ekheleni ra tinghala, u suka ni le tintshaveni ta tiyingwe.

⁹ U ndzi yivile mbilu, we murhandziwa, nhwana wanga; loko u ndzi tlhava hi tihlo, wa ndzi tsakisa, vuhlalu lebyi u byi ambaleke byi ndzi koka mahlo.

¹⁰ Rirhandzu ra wena, a hi ku tsokombela ka rona murhandziwa, we nhwana wanga, vhinyo a yi fiki eka rirhandzu ra wena hi ku tsokombela, ku nun'hwela ka mafurha lawa u ma tolaka ku tlula swinun'hweriso hinkwaswo.

¹¹ Milomo ya wena yi ntonta vulombe, we murhandziwa; ehansi ka ririmi ra wena ku ni swihlenge ni ntswamba, ku nun'hwela ka swiambalo swa wena ku fana ni ku nun'hwela ka Lebanoni.

¹² Murhandziwa, ye nhwana wanga, i ntanga lowu biyeleriweke, o va wona hakunene! I xihlovo lexi funengetiweke.

¹³ I ntanga lowu milaka mirhi ya magrenada, ni mihandzu hinkwayo leyo nandziha, ku katsa ni swimidyana swa swinun'hweriso swa hena na narda,

¹⁴ na safroni, na khalamusi, na kinamoni, ni mirhi hinkwayo ya risuna, ni mirha, ni mhangana, ni swinun'hweriso hinkwaswo swa nkoka.

¹⁵ I xihlovo xa le ntangeni, xihlovo xa mati lama pfelelaka, i xinambyana lexi khulukaka, xi khuluka xi huma eLebanoni.

Nhwana

¹⁶ We moya wa le n'walungwini, pfuka, na wena moya wa le dzongeni, tana! Hungelani entangeni wa mina, mi hangalasa ku nun'hwela ka wona, leswaku murhandziwa a ta ta entangeni wa yena, a ta dya mihandzu ya wona leyo nandziha.