Risimu ra Tinsimu 3 - BIBELE Mahungu Lamanene

¹ Nivusiku loko ndzi etlele, ndzi n'wi vitanile murhandziwa wa mbilu yanga, ndzi n'wi lavile, kambe a ndzi n'wi kumanga. [Ndzi vitanile, kambe a nga pfumelanga.]

² Sweswi ndzi ta pfuka, ndzi rhendzeleka ni muti, ndzi ya etindleleni ni le rivaleni ndzi ya n'wi lava kona, yena murhandziwa wa mbilu yanga, hikuva ndzi n'wi lavile, kambe a ndzi n'wi kumanga.

³ Varindzi va ndzi vonile va ri karhi va rhendzeleka ni muti, ndzi ku ka vona: “Xana a mi ndzi vonelanga murhandziwa wa mbilu yanga, xana?”

⁴ Ndzi te ndza ha ku hundza varindzi, ndzo kuma murhandziwa wa mbilu yanga, hiloko ndzi n'wi vukarha, ndzi nga n'wi tshiki ndzi ko ndzi ya n'wi nghenisa endlwini ya manana, yena loyi a ndzi kombeke misava.

Jaha

⁵ N'we vanhwanyana va Yerusalema, ndzi hlambanyeleni hi timhala ni timbavala, leswaku mi nge pfuxi murhandziwa wa mina a nga si swi rhandza.

Tinxangwana

⁶ Xana i ncini lexi taka hi tlhelo ra mananga, xo fana ni papa ra musi, xi n'wan'waseriwile mafurha ya mirha ni mirhi ya risuna, ni swinun'hweriso hinkwaswo leswi xavisiwaka, xana?

⁷ vonani, i Solomoni la rhwariweke exiluvelweni; ú rhendzeriwile hi tinghwazi ta 60 leti humaka exikarhi ka tinhenha ta Israele.

⁸ Hinkwavo va hlomile matlhari, i tinghwazi enyimpini; un'wana ni un'wana ú ni fumu enyongeni ku tisirhelela ha rona nivusiku.

⁹ Hosi Solomoni ú tiendlerile xiluvelo hi timhandze ta le Lebanoni;

¹⁰ milenge ya xona i ya silivhere, xikhigetelo xa kona i xa nsuku, kasi xitshamu xona i xa xivunguvungu, xi rhungeleriwile xi saseka hi vanhwana va Yerusalema.

¹¹ N'wina vanhwana va Siyoni, humani mi ya vona hosi Solomoni; ú ambele harhi ya vuhosi leyi a nyikiweke hi mana wa yena; ú tlhandlekiwile yona esikwini ra ku teka ka yena, ri nga siku leri a kumeke xo tsakisa mbilu yakwe.