Risimu ra Tinsimu 2 - BIBELE Mahungu Lamanene

¹ Mina ndzi xiluva xa le Xaroni, ndzi xiluva xa le minkoveni.

Jaha

² Exikarhi ka vanhwanyana, murhandziwa wa mina ú fana ni xiluva lexi rhendzeriweke hi mitwa.

Nhwana

³ Exikarhi ka majaha, murhandziwa wa mina ú fana ni murhi wa muapula lowu nga swihlahleni. Ndzi tshamile hi ntsako lowukulu endzhutini wa wona, mihandzu ya wona ya ndzi nandzihela.

⁴ Ú ndzi tisile endlwini ya nkhuvo, mujeko wa yena ehenhla ka mina i rirhandzu.

⁵ Ndzi laveleni mihandzu ya vhinya leyi omisiweke, mi pfuxa ni matimba ya mina hi maapula, hikuva ndza fa hi rirhandzu.

⁶ Onge voko rakwe ra ximatsi ri nga va exikosini xa mina, lera xinene rona ri va ri ndzi singarherile.

Jaha

⁷ N'we vanhwanyana va Yerusalema, ndzi hlambanyeleni hi timhala ni timbavala leswaku mi nge pfuxi murhandziwa wa mina a nga si swi rhandza.

Nhwana

⁸ Ndzi twa rito ra murhandziwa, hi luyaa, wa karhi wa ta, ú thamuka-thamuka tintshava, a tlula-tlula ni switsunga.

⁹ Murhandziwa wa mina, ú fana ni mhala kumbe mbavala. Vonani, hi luyaa, ú yimile kusuhi ni rihlampfu ra ka hina, ú hlometela hi le mafasitereni, a languta endzeni.

¹⁰ Murhandziwa wa mina wa ndzi vitana, ú ri: “Tana hi famba, xiluva xanga, suka u yima, we murhandziwa,

¹¹ hikuva vuxika byi hundzile, ni mpfula yi xile, yi hangalakile.

¹² Swiluva na swona swi balekile etikweni, nkarhi wa ku yimbelela ka tinyanyana wu fikile, ku twala rito ra tuva etikweni ra ka hina.

¹³ Minkuwa yi tswarile, mirhi ya vhinya na yona yi balekile swiluva swo nun'hwela. Tlakuka, we murhandziwa, tana hi famba, wena xiluva xanga!”

Jaha

¹⁴ Wena xituvana xa mina, lexi tumbelaka emaribyeni ni le mabakweni ya riwa, u nge, ndzi vona nghohe ya wena; vulavula, ndzi ku twa, hikuva rito ra wena ra tsokombela, ni nghohe ya wena yi xongile.

Nhwana

¹⁵ Hi khomeleni timhungubye ni swimhungubyana, swi ta ka swi nga onhi masimu ya vhinya, hikuva masimu ya hina ya vhinya ma balekile swiluva.

¹⁶ Loyi i murhandziwa wa mina, na mina ndzi wa yena; ntlhambi wa yena ú wu risela exikarhi ka swiluva,

¹⁷ vurhonga byi ko byi tshwuka, ni dyambu ri ko ri tlhava. Murhandziwa, vuya hi ku hatlisa, ku fana ni mhala kumbe mbavala, etintshaveni ta Betere.