Risimu ra Tinsimu 1 - BIBELE Mahungu Lamanene

¹ Risimu ra tinsimu, ri nga ra Solomoni.

Nhwana

² Onge u ngo ndzi ntswontswa, u ndzi ntswontswa hi nomo wa wena, hikuva rirhandzu ra wena ri tlula vhinyo hi ku tsokombela.

³ Mafurha ya wena yo tola ma nun'hwela. Vito ra wena rona ri fana ni mafurha ya risuna lama chuluriwaka. Hikokwalaho vanhwana va ku rhandza.

⁴ Hatlisa u ndzi koka, hi tsutsuma swin'we. Ndzi nghenise endlwini ya wena, we hosi yanga. Hi ta ku dzunisa, hi ku tsakela; hi ta tlangela rirhandzu ra wena, leri tsokombelaka ku tlula vhinyo. Kunene swa fanela leswaku vanhwana va ku rhandza.

⁵ Ndzo va ni ntima ntsena, kambe ndzi sasekile, n'we vanhwanyana va Yerusalema. Ndzi fana ni mintsonga ya Kedara hi ntima, hi ku saseka ndzi fana ni makhetenisi ya yindlu ya Solomoni.

⁶ Mi nga ndzi monyi leswi ndzi dzwihaleke, ndzi lo hisiwa hi dyambu. Lava nga ndzi fela mona i vamakwerhu va xinuna: Va ndzi endlile murindzi wa masimu ya vhinya, ndzi pfumala nkarhi wo tihlayisela ya mina nsimu.

⁷ Ndzi byele, wena murhandziwa wa mbilu yanga, ndzi kombe laha u riselaka kona, ni laha ntlhambi wa wena wu vundzaka kona ninhlekanhi. Hikwalaho ka yini mina ndzi fanele ku tsendzeleka, ndzi landzelela mintlhambi ya vanghana va wena xana?

Jaha

⁸ Loko u nga swi tivi, wena mbhurhi exikarhi ka vanhwana, landzelela mabudula ya ntlhambi, u byisa swimbutana swa wena swi kongoma emixaxeni ya varisi.

⁹ Murhandziwa, ndzi ku fanisa ni hanci leyi kokaka kalichi ya Faro.

¹⁰ Misisi ya wena leyi lukiweke ya ku sasekela, nhamu ya wena yi bombisiwile hi vuhlalu bya nkoka.

¹¹ Hi ta ku endlela nketani ya nsuku, hi yi sasekisa hi silivhere.

Nhwana

¹² Loko n'wini wanga a ha wisile exitshan'wini, ku nun'hwela ka mafurha lawa ndzi ma toleke, ko nkhúléè!

¹³ Murhandziwa wa mina yena, ú fana ni xinkwamana xa mirhi ya risuna lexi vekiweke exikarhi ka mavele ya mina.

¹⁴ Murhandziwa wa mina ú fana ni xichocho xa swiluva swo basa leswi milaka entangeni wa vhinya le Eni-Gedi.

Jaha

¹⁵ Murhandziwa, u sasekile wo va mbhurhi ya ku vatlwa! Mahlo ya wena ma fana ni ya matuva.

Nhwana

¹⁶ Murhandziwa, u mpohlo, wo va mbhurhi ya jaha hakunene! Hi ta wisa ebyanyini bya rihlaza.

¹⁷ Timhandze ta yindlu ya hina ti ta va mirhi ya kedari, timbalelo ta kona ti ta va mirhi ya kipresi.