Rhuti 1 - BIBELE Mahungu Lamanene

Ta Elimeleke ni ndyangu wa yena

¹ Eminkarhini ya khale loko tiko ra ha fambisiwa hi vaavanyisi, ku ve ni dyandza etikweni. Wanuna un'wana wa muti wa Betlehema etikweni ra Yuda, a rhurhela etikweni ra Mowabu, swin'we ni nsati wa yena ni majaha ya yena mambirhi.

² Vito ra wanuna loyi a a ri Elimeleke, nsati wa yena a a ri Nahumi. Mavito ya majaha lamambirhi a va ku i Mahaloni na Kiliyoni. A va ri va le Efrata, kusuhi ni muti wa Betlehema eYuda. Va fikile etikweni ra Mowabu, va aka kona.

³ Endzhaku ka sweswo Elimeleke nuna wa Nahumi a fa, kutani Nahumi a sala ni majaha ya yena lamambirhi.

⁴ Majaha lawa ma teka vasati exikarhi ka Vamowabu. Un'wana a a ri Oripa, loyi un'wana a a ri Rhuti. Va tshama swin'we malembe lama lavaka ku ringana khume;

⁵ kambe Mahaloni na Kiliyoni va fa ha vambirhi, kutani Nahumi a sala a feriwile hi nuna ni vana va yena lavambirhi va xinuna.

Ta Rhuti na Nahumi

⁶ Loko a ha ri etikweni ra Mowabu, Nahumi a twa leswaku HOSI Xikwembu xi pfunile tiko ra xona, xi ri phamela swakudya. Hikokwalaho a longa a ri ni vingi va yena, leswaku va ta suka etikweni ra Mowabu.

⁷ Kutani yena ni vingi va yena vambirhi va huma emutini lowu a va tshama eka wona, va khoma ndlela yo tlhelela etikweni ra Yuda.

⁸ Endleleni Nahumi a ku ka vingi va yena: “Mukani, titlheleleni karikwenu hi vumbirhi bya n'wina. HOSI a yi mi hlayise hi ku tshembeka, hilaha a mi tshembekile hakona, eka mina ni le ka lava feke.

⁹ HOSI a yi mi nyike ku tshamiseka, un'wana ni un'wana evukatini bya yena lebyintshwa.” Kutani a va angarha, a va ntswontswa, kambe vona va tlhaveka va rila,

¹⁰ va ku ka Nahumi: “E-e, a hi swona! Hi ta famba na wena karikwenu.”

¹¹ Kambe Nahumi a ku: “Tlhelani vana vanga. Mi ta fambela yini na mina ke? Xana ndzi nga ha mi velekela majaha lawa ma nga ta va vanuna va n'wina xana?

¹² Tlhelani vana vanga, mi tifambela. Ndzi hundzeriwe hi nkarhi wo tlhela ndzi tekiwa. Hambiloko ndzi nga vula ndzi ku, ndzi ni xitshembiso xo kumana ni wanuna vusiku byebyi, ndzi veleka majaha,

¹³ xana mi nga va yimela va kondza va kula ke? Mi nga tshika ku tekiwa ke? A hi swona, vana vanga! Loko ndzi mi anakanya, ndzi mi twela vusiwana ngopfu, hikuva HOSI yi ndzi fularhele.”

¹⁴ Loko va twa sweswo, va tlhaveka va tlhela va rila. Loko a ri Oripa, a ntswontswa n'wingi wa yena, a hambana na yena; kasi Rhuti yena a namarhela Nahumi.

¹⁵ “Languta”, ku vula Nahumi, “makwenu ú tlhelele karikwavo ni le ka swikwembu swa ka vona. Tlhela na wena, u landza makwenu!”

¹⁶ “U nga ndzi sindzisi ku ku tshika empfhukeni kumbe ku ku fularhela”, ku hlamula Rhuti. “Laha u yaka kona, ndzi ta ya kona na mina. Lomu u nga ta tshama kona, ndzi ta tshama kona na mina. Rixaka ra wena ri ta va rixaka ra mina, naswona Xikwembu xa wena xi ta va Xikwembu xa mina.

¹⁷ Ndzi ta fela laha u nga ta fela kona, ni ku lahliwa, ndzi ta lahliwa kona. Ndza tiyisa hi ku hlambanya emahlweni ka HOSI ndzi ku: Hi ta hambanisa hi rifu ntsena.”

¹⁸ Loko Nahumi a vona leswaku Rhuti a tiyimisele ngopfu ku famba na yena, a nga ha vulanga nchumu.

¹⁹ Hikokwalaho va famba swin'we, va ko va ya fika eBetlehema. Kakuloko va ha nghena eBetlehema, vaaki hinkwavo va va hlamala swinene, kutani vavasati va vutisana va ku: “Xana a nga va a ri yena Nahumi ke?”

²⁰ Yena a ku ka vona: “Mi nga ha ndzi vuli ‘Nahumi’, kambe mi ndzi vula ‘Mara’, hikuva Xikwembu-xa-matimba-hinkwavo xi ndzi khomise xo tika.

²¹ Ndzi fambile endzalweni, kambe HOSI yi ndzi vuyisile ndzi ri hava nchumu emandleni. Mi ndzi vulela yini ‘Nahumi’, kasi HOSI yi ndzi tshikile, xona Xikwembu-xa-matimba-hinkwawo xi ndzi vangele maxangu.”

²² Hi swona leswi Nahumi a nga vuyisa swona hi le tikweni ra Mowabu, a ri ni n'wingi wa yena Rhuti, munhu wa le Mowabu. Mavele ya maxalana a ma sungula ku tshoveriwa, loko va fika eBetlehema.