Pisalema 99 - BIBELE Mahungu Lamanene

Mufumi wa hina i Xikwembu lexo kwetsima

¹ HOSI Xikwembu xa fuma, xi tshamile ehenhla ka tikerubu; vamatiko va rhurhumela hi ku chava, misava ya tsekatseka.

² HOSI Xikwembu lexi nga Siyoni xi ni matimba, vamatiko hinkwavo va le hansi ka xona.

³ We HOSI, vanhu a va ku dzunise, hikuva vukulu bya wena bya chavisa, hi wena ntsena la kwetsimeke.

⁴ Wena mufumi wa matimba, u rhandza nawu, kutani leswo lulama swi tiyisiwa hi wena. Hi wena u tiseke nawu ni ku lulama exikarhi ka va ka Yakobo.

⁵ Twarisani HOSI Xikwembu xa hina, xi nkhinsameleni laha xi tikombaka kona. HOSI Xikwembu hi xona ntsena xi kwetsimeke!

⁶ Exikarhi ka vaprista va xona, a ku ri na Muxe na Aroni, na yena Samiele a a ri un'wana wa lava va xi khongelaka. Vanhu lava a va huwelela eka HOSI Xikwembu, kutani xi va hlamula.

⁷ A xi vulavula na vona xi ri epapeni leri nembelelaka, kutani vona a va hlayisa swiletelo swa xona ni milawu leyi xi va nyikeke yona.

⁸ We HOSI Xikwembu xa hina, a wu va hlamula, u va rivalela, kambe a wu nga tshiki ku va ba loko va ku dyoherile.

⁹ Twarisani HOSI Xikwembu xa hina, xi nkhinsameleni entshaveni ya xona leyo hlawuleka, hikuva xona xi kwetsimile.