Pisalema 98 - BIBELE Mahungu Lamanene

Xikwembu xi fuma hi ku lulama

Pisalema.

¹ Dzunisani HOSI Xikwembu hi ku yimbelela risimu lerintshwa, hikuva mintirho ya xona ya hlamarisa. Hi ntamu wa xona ni ku hlawuleka ka xona lokukulu, xi hlurile valala va xona.

² HOSI Xikwembu xi twarisile ku hlula ka xona, xi kombile vamatiko hilaha xi lwelaka vanhu va xona hakona.

³ A xi tshikanga ku rhandza Vaisraele, ni ku va la tshembekaka eka vona; hambi va ri vanhu va le matikweni ya le kule, va swi vonile leswaku Xikwembu xa hina i muhluri.

⁴ N'wina vaaki hinkwavo va misava huwelelani mi dzunisa HOSI, sumani tinsimu mi yimbelela mi ri karhi mi ba minkulungwana;

⁵ yimbelelani mi twarisa HOSI, mi ri karhi mi chaya tiharipa ta n'wina, swi nandziha.

⁶ Chayani tinanga, mi ba ni mhalamhala, mi huwelela hi ku tsaka emahlweni ka HOSI Xikwembu mufumi wa hina.

⁷ Lwandle a ri pfume ni hinkwaswo leswi nga ka rona, misava ni vaaki va yona a va tsake.

⁸ Milambu a yi phokotele mavoko, tintshava hinkwato a ti be minkulungwana,

⁹ loko HOSI Xikwembu xi ta ku ta fuma misava. Xi ta yi avanyisa hi ku lulama, vamatiko xi ta va fambisa hi nawu.