Pisalema 97 - BIBELE Mahungu Lamanene

Xikwembu i mufumi wa vanhu hinkwavo

¹ HOSI Xikwembu xa fuma, yimbelela we misava, na n'wina matiko ya le kule, tsakani!

² HOSI Xikwembu xi rhendzeriwe hi mapapa ya ntima ni munyama, masungulo ya vuhosi bya xona i nawu ni ku lulama.

³ Ndzilo wu xi rhangela emahlweni, wu herisa valala va xona matlhelo hinkwavo.

⁴ Xi voninga misava hi rihati ra xona, matiko ma swi vona ma rhurhumela.

⁵ Tintshava ta n'oka kukota mafurha emahlweni ka HOSI Xikwembu, xona N'wini wa misava hinkwayo.

⁶ Matilo ma twarisa ku lulama ka Xikwembu, vanhu hinkwavo va hlalela ku kwetsima ka xona.

⁷ Hinkwavo lava khongelaka swikwembu swa swifaniso, va ta khomiwa hi tingana, hikuva va tinyungubyisa hi leswi nga pfuniki nchumu. Swikwembu leswi hinkwaswo a swi nkhinsamele HOSI Xikwembu!

⁸ We HOSI, va le Siyoni va swi twile, kutani va tsaka, miti ya le Yuda yi ba nkulungwana hikwalaho ka maavanyisele ya wena.

⁹ We HOSI, u Xikwembu lexi nga henhla-henhla lexi fumaka misava hinkwayo, swikwembu hinkwaswo swi le hansi ka wena.

¹⁰ N'wina mi rhandzaka HOSI Xikwembu, vengani leswo homboloka! HOSI Xikwembu xi sirhelela vutomi bya malandza ya xona, xi ma kutsula emavokweni ya lavo biha.

¹¹ Lavo lulama va tlhavela hi ku vonakala, lava nga ni timbilu to basa va kuma ku tsaka.

¹² Titsakeleni eHosini n'wina lavo lulama, mi twarisa vito ra yona lero hlawuleka.