Pisalema 96 - BIBELE Mahungu Lamanene

Xikwembu hi xona mufumi lonkulu

¹ Yimbelelani risimu lerintshwa mi dzunisa HOSI Xikwembu, n'wina vanhu va misava hinkwayo, yimbelelani mi xi dzunisa.

² Yimbelelani mi dzunisa HOSI, mi tlangela vito ra yona; siku rin'wana ni rin'wana vulani leswaku Xikwembu i muponisi.

³ Hlayelani vanhu hinkwavo ku dzuneka ka HOSI, matiko hinkwawo a ma tivisiwe mintirho ya yona leyo hlamarisa.

⁴ HOSI Xikwembu i xikulu, xi dzuneka ngopfu, xi fanele ku chaviwa ku tlula swikwembu swin'wana hinkwaswo.

⁵ Swikwembu hinkwaswo swa vamatiko swo va swifaniso ntsena, kasi HOSI Xikwembu hi xona xi tumbuluxeke matilo.

⁶ Ku dzuneka ni vukulukumba swi le ka xona, Tempele ya xona yi tele hi matimba ni ku saseka.

⁷ N'wina vamatiko, dzunisani HOSI Xikwembu, tlangelani matimba ya xona.

⁸ Xi twariseni mi dzunisa vito ra xona, tanani eTempeleni ya xona mi ri ni swa magandzelo.

⁹ Korhamani emahlweni ka xona loko xi humelela eku kwetsimeni ka xona, n'wina vanhu va misava hinkwayo, xi kombeni xichavo.

¹⁰ Byelani vanhu va matiko hinkwawo mi ku: “HOSI Xikwembu xa fuma, hikokwalaho misava yi tiyile, a yi tsekatseki; xi ta avanyisa vanhu hi ku lulama.”

¹¹ Matilo a ma tsake, misava a yi be nkulungwana, lwandle a ri pfume ni hinkwaswo leswi nga ka rona.

¹² Masimu ni hinkwaswo leswi milaka eka wona a swi tsake, mirhi hinkwayo a yi yimbelele hi ku tsaka,

¹³ hikuva HOSI Xikwembu xa ta ku ta fuma misava; xi ta yi avanyisa hi ku lulama, xi fambisa vamatiko entiyisweni wa xona.