Pisalema 95 - BIBELE Mahungu Lamanene

Ku dzunisa Xikwembu ni ku xi yingisa

¹ Tanani hi ta dzunisa HOSI Xikwembu hi minkulungwana, hi twarisa loyi a nga ribye ra hina ni muponisi wa hina.

² A hi yeni emahlweni ka xona hi ri ni minkhenso, hi xi twarisa hi tinsimu,

³ hikuva HOSI i Xikwembu lexikulu, xi fuma swikwembu hinkwaswo, xa swi tlula hi vukulu.

⁴ Misava hinkwayo yi le mavokweni ya xona, minkova leyi enteke ni tintshava leto leha i swa xona.

⁵ Xi fuma lwandle, hikuva ri endliwe hi xona, na wona matiko ma vumbiwile hi xona.

⁶ Tanani, hi ta korhama hi gandzela HOSI Xikwembu, hi nkhinsamela xona xi hi endleke,

⁷ hikuva hi xona xi nga Xikwembu xa hina, hi vanhu lava xi va risaka ni ntlhambi lowu xi wu fambisaka. Namuntlha hi wo nkarhi! Yingisani leswi xi mi byelaka swona! Xi ri:

⁸ “Mi nga tinonon'hwisi ku fana ni vatata wa n'wina le Meriba, esikwini leri a va ri le Masa emananga,

⁹ laha va ndzi ringeke kona va ndzi hlundzukisa, hambileswi a va vonile mintirho ya mina.

¹⁰ Vanhu lava va ndzi phirhile malembe ya 40, ndzi kondza ndzi ku: ‘I vanhu lava lahlekeke, vo oma tinhloko, a va na mhaka ni leswi ndzi swi lavaka!’

¹¹ Hikokwalaho eku hlundzukeni ka mina ndzi hlambanyile ndzi ku: ‘A va nga ngheni etikweni leri a ndzi naverile ku va wisisa eka rona!’ ”