Pisalema 94 - BIBELE Mahungu Lamanene

Xikwembu a xi tshiki vanhu va xona

¹ We HOSI, u Xikwembu lexi rihiselaka; tikombe wena Xikwembu murihiseli!

² Suka u yima wena muavanyisi wa misava, bana lava tikurisaka, hikuva va lo tivangela.

³ We HOSI, xana lavo homboloka va ta ba nkulungwana ku ya fika rini, va ta tshika rini ku tidzunisa xana?

⁴ Hinkwavo lava endlaka leswo biha, a hi ku rhukana ka vona loko va vulavula, va tibumabuma ngopfu.

⁵ We HOSI, va xanisa tiko ra wena, va yisa vanhu va wena hansi.

⁶ Va dlayetela tinoni ni valuveri, va herisa ni lava pfumalaka vatswari,

⁷ va ri karhi va ku: “HOSI a yi swi voni, Xikwembu xa va ka Yakobo a xi na mhaka na swona!”

⁸ N'wina vanhu vo pfumala tindleve, yingisani; mintlunya ndzin'wina, xana mi ta tlhariha rini xana?

⁹ Loyi a hi nyikeke tindleve, xana a nge twi xana? Loyi a hi vumbeke mahlo, xana a nge voni xana?

¹⁰ Xana loyi a letelaka vamatiko, a nge pfi a va ba xana? Hi yena la dyondzisaka vanhu, ú ni vutivi!

¹¹ HOSI Xikwembu xi tiva miehleketo ya vanhu, xa swi tiva leswaku i moyanyana ntsena!

¹² Ku katekile munhu loyi a layiwaka hi wena, we HOSI, loyi u n'wi dyondzisaka Nawu wa wena.

¹³ Munhu wo tano, u n'wi rhulisa mbilu enkarhini wa maxangu, ku kondza loko lavo homboloka va hoxiwa ekheleni.

¹⁴ HOSI Xikwembu a xi tshiki vanhu va xona, ndzhaka ya xona a xi nga yi cukumeti.

¹⁵ Ku lulama ku ta tlhela ku va kona etihubyeni, vanhu hinkwavo lavo lulama va ta ku seketela.

¹⁶ Xana i mani loyi a nga yimaka na mina a lwa ni lavo homboloka xana? Loyi a nga ndzi seketelaka a lwa ni lavo biha i mani xana?

¹⁷ Loko HOSI Xikwembu a xi nga ndzi pfunanga, a ndzi ta va ndzi rhelerile khale exivandleni xa vafi!

¹⁸ Nkarhi lowu a ndzi ehleketa leswaku ndzi ta rhetemuka, we HOSI u ndzi khomile hi rirhandzu ra wena.

¹⁹ Loko ndzi ri maxangwini layo tala ndzi pfumala ku rhula, u ndzi khongoterile, ndzi kuma ku tsaka.

²⁰ Xana vafumi lavo homboloka, u ta twanana na vona loko va hundzuluxa milawu, va endla leswo biha xana?

²¹ Va endla makungu yo herisa lavo lulama, kutani la pfumalaka nandzu va n'wi avanyisela rifu.

²² Hambiswiritano HOSI Xikwembu xi hundzuke khokholo ra mina, hi xona ribye leri ndzi tumbelaka eka rona.

²³ Lavo homboloka xi ta va ba hikwalaho ka vubihi bya vona, xi ta va herisa hi mhaka ya swiendlo swa vona; hakunene HOSI Xikwembu xa hina xi ta va herisela makumu.