Pisalema 93 - BIBELE Mahungu Lamanene

Xikwembu i mufumi wa hinkwaswo

¹ Xikwembu i mufumi wa hinkwaswo, xi ambele vukulukumba; xi tikhama hi matimba ya xona hikokwalaho misava yi tiyile yi nge tsekatseki.

² We HOSI, xiluvelo xa wena u xi tiyisile ku sukela khale, na wena u vile kona minkarhi hinkwayo.

³ Milambu ya pfuma we HOSI, yi pfuma ngopfu, mpfumawulo wa yona wu twakala kule.

⁴ Kambe we HOSI ya le henhla-henhla u tlula hi matimba milambu leyikulu leyi hobomulanaka ni magandlati layo chavisa ya lwandle.

⁵ Swileriso swa wena swi tiyile we HOSI, Tempele ya wena yi fanele ku hlawuleka minkarhi hinkwayo.