Pisalema 92 - BIBELE Mahungu Lamanene

Xikwembu xa dzunisiwa, hikuva xi ni vunene

Pisalema. Risimu ra siku ra Savata.

¹ We HOSI, a hi ku tsakisa ka swona ku ku nkhensa ni ku twarisa vito ra wena hi tinsimu, wena la nge henhla-henhla;

² swa tsakisa ku twarisa rirhandzu ra wena nimixo ni ku tshembeka ka wena nimadyambu,

³ ku ri karhi ku chayiwa tiharipa letikulu ni letitsongo, ku chayiwa ni switende.

⁴ Ntirho wa wena we HOSI, wa ndzi tsakisa, ndzi ba nkulungwana ndzi tlangela mintirho ya mavoko ya wena.

⁵ We HOSI, mintirho ya wena a hi ku kula ka yona! Miehleketo ya wena yi entile ngopfu!

⁶ Mhaka leyi, mintlunya a yi nga yi tivi, ni swiphunta a swi nga yi twisisi.

⁷ Lavo homboloka va nga rhumbuka kukota byanyi, hinkwavo lava endlaka leswo biha va nga humelela, kambe eku heteleleni va ta herisiwa va nyamalala.

⁸ We HOSI, hi wena u fumaka minkarhi hinkwayo.

⁹ Valala va wena hi lava we HOSI, va ta hela, hinkwavo lava endlaka leswo biha va ta hangalasiwa.

¹⁰ Kambe mina u ndzi nyikile matimba ya nyarhi, u ndzi totile mafurha layo nun'hwela enhlokweni.

¹¹ Valala va mina, ndzi va langutela hansi; makungu ya lavo biha lava va ndzi hlaselaka, a ndzi ma chavi ni loko ndzi nga ma twa hi tindleve ta mina.

¹² Lavo lulama va ta mila kukota ncindzu, va ta kula ku fana ni murhi wa kedari wa le Lebanoni.

¹³ Va simekiwile endlwini ya HOSI Xikwembu xa hina, va phaka marhavi eswivaveni swa Tempele ya xona.

¹⁴ Va ha veka mihandzu hambi va dyuhele, va ha tsakama, va tshama va tiyile.

¹⁵ Leswi swi komba ku lulama ka HOSI Xikwembu; hi xona ribye ra mina, ku hava leswo homboloka eka xona.