Pisalema 91 - BIBELE Mahungu Lamanene

Xikwembu i khokholo ra hina

¹ Munhu loyi a sirheleriwaka hi HOSI Xikwembu xa le henhla-henhla, loyi a wisaka endzhutini wa Xikwembu lexi nga ni matimba hinkwawo,

² ú xi dzunisa a ku: “U khokholo leri ndzi tumbelaka eka rona, u Xikwembu xa mina lexi ndzi xi tshembaka.”

³ Hi xona Xikwembu lexi nga ta ku ponisa entlhan'wini lowu rhiyiweke emahlweni ka wena, ni le ntungwini lowu wu hetaka vanhu.

⁴ Xi ta ku hlayisa xi ku funengeta ku fana ni huku leyi fukamelaka swiciwana swa yona, ku tshembeka ka xona ku ta ku sirhelela kukota xitlhangu.

⁵ Makhombo lama taka nivusiku, hambi yi ri miseve leyi copiwaka ninhlekanhi, a wu nga swi chavi;

⁶ a wu nga chavi mavabyi lama ku ongaka exinyamini, hambi swi ri switlhavi leswi dlayaka dyambu xi lo hosi!

⁷ Hambiloko vanhu va madzana-dzana va nga wa kusuhi na wena, makhombo lawa ma nge ku humeleli.

⁸ U to swi hlalela kunene, u vona hilaha Xikwembu xi baka hakona lavo homboloka.

⁹ Hakunene HOSI Xikwembu i khokholo ra wena, u vekile vutshamo bya wena eka Loyi a nge henhla-henhla.

¹⁰ Hikokwalaho ku hava xo biha lexi nga ta ku humelela, mavabyi a ma nga ngheni emutini wa wena.

¹¹ Xikwembu xi ta lerisa tintsumi ta xona leswaku ti ku hlayisa hinkwako laha u nga ta ya kona.

¹² Ti ta ku tlakula hi mavoko ya tona, leswaku nenge wa wena wu nga tshuki wu vavisiwa hi ribye.

¹³ U ta kandziyela nghala ni xivatlankombe, u phyandlasela vana va nghala ni tinyoka.

¹⁴ Xikwembu xi ri: “Leswi munhu loyi a ndzi tivaka ni ku ndzi namarhela, ndzi ta n'wi ponisa ndzi n'wi hlayisa.

¹⁵ Loko a ndzi vitana, ndzi ta n'wi hlamula, ndzi ta va na yena emaxangwini, ndzi n'wi lamulela ndzi n'wi nyika ni ndzhuti.

¹⁶ Ndzi ta engetela malembe ya yena ya ku hanya, kutani ú ta swi vona leswaku hi mina ndzi n'wi ponisaka.”