Pisalema 90 - BIBELE Mahungu Lamanene

Xiyenge xa vumune (Tipisalema 90 – 106) Malembe ya munhu ma komile ngopfu

Xikhongelo xa Muxe munhu wa Xikwembu.

¹ We N'wini wa hina, ku sukela eminkarhini ya vakokwa wa hina, hi kumile vutshamo eka wena.

² Loko tintshava ti nga si va kona, ni loko u nga si tumbuluxa misava ni leswi nga ka yona, u vile Xikwembu, naswona wa ha ta va xona hilaha ku nga heriki.

³ U lerisa vanhu u ku: “Tlhelelani entshurini!” Kutani u va tlherisela kona.

⁴ Malembe ya khume ra madzana emahlweni ka wena ma fana ni siku ra tolo loko ri hundzile, kumbe nkarhinyana wo koma nivusiku.

⁵ U kukula vanhu, va hundza laha misaveni kukota norho; va fana ni byanyi lebyi hlukaka nimixo,

⁶ kambe loko dyambu ri ya eku peleni, byanyi byebyo byi nga baleka swiluva nimixo, bya vuna byi oma.

⁷ Hakunene ha dlawa hi vukari bya wena, ku hlundzuka ka wena ka hi chavisa.

⁸ U andlala ku homboloka ka hina emahlweni ka wena; swidyoho leswi hi swi endleke exihundleni, wa swi paluxa.

⁹ Masiku ya ku hanya ka hina ma komisiwa hi vukari bya wena, malembe ya kona onge i moyanyana ntsena.

¹⁰ Hi hanya malembe ya 70, ni lava tiyeke va nga fika eka 80, kambe malembe ya kona ma tele maxangu ni ku tikeriwa; masiku ya hina ma komile, mo haha kunene!

¹¹ Xana i mani la anakanyaka matimba ya vukari bya wena xana? La tsundzukaka ku hlundzuka ka wena loku chavisaka i mani ke?

¹² Hikokwalaho hi dyondzise ku hlaya masiku ya ku hanya ka hina, kutani hi ta kuma vutlhari.

¹³ We HOSI, tana u ta hi pfuna, hina malandza ya wena; xana u ta yima kule na hina ku ya fika rini xana?

¹⁴ Hi kombe rirhandzu ra wena ka ha ri mixo, leswaku hi ta tsaka hi ku dzunisa, vutomi bya hina hinkwabyo.

¹⁵ Hi nyike masiku ya ntsako ku ringana ni lawa u hi xaniseke ha wona, u hi nyika ni malembe lamanene yo ringana ni lawa hi voneke maxangu ha wona.

¹⁶ Ntirho wa wena a wu tikombe eka hina malandza ya wena, ni lava va ha taka a va hlalele ku dzuneka ka wena.

¹⁷ Hi funengete hi tintswalo ta wena, we Xikwembu xa hina ni N'wini wa hina; katekisa mintirho ya hina, ina yi katekise!