Pisalema 9 - BIBELE Mahungu Lamanene

Xikhongelo xa ku nkhensa maavanyisele layo lulama ya Xikwembu

Risimu ra Muyimbelerisi, leri sumeriwaka ehenhla. Pisalema ya Davhida.

¹ We HOSI, ndza ku tlangela hi mbilu ya mina hinkwayo, ndzi rungulela vanhu mintirho ya wena hinkwayo leyo hlamarisa.

² Hikwalaho ka wena, ndza tsaka hi ntsako lowukulu, ndzi yimbelela ndzi dzunisa vito ra wena, wena Xikwembu xa le henhla-henhla.

³ Loko u humelela, valala va mina va tsutsuma, va khuguka va wa, va fela kwalaho.

⁴ Wena u yima na mina, u lwela tifanelo ta mina; u tshamile exitshan'wini xa wena xa vuhosi, u avanyisa hi ku lulama.

⁵ U tshinyile matiko, u lovisa lavo homboloka, mavito ya vona u ma herisela makumu.

⁶ Valala va nyamalalele makumu, miti ya vona u yi hangalasile, ku sala marhumbi ntsena, yi nga ka yi nga ha tsundzukiwi hi munhu.

⁷ Kambe HOSI yi tshama eku fumeni ka yona hilaha ku nga heriki, yi yimisile xitshamu xa yona xa vuavanyisi;

⁸ kutani yi fuma misava hi ku lulama, yi avanyisa vanhu hi ntiyiso.

⁹ HOSI i khokholo ra lava xanisiwaka, eminkarhini ya makhombo, va tumbela kona.

¹⁰ Vanhu lava tivaka vito ra wena, we HOSI, va titshembela wena, hikuva a wu fularheli lava fambaka va ku lava.

¹¹ Yimbelelani mi dzunisa HOSI leyi fumaka yi ri eSiyoni, rungulani mintirho ya yona ematikweni!

¹² Xikwembu a xi rivali vapfumari, ku rila ka vona xa ku twa, xi rihiseta lava va va dlayaka.

¹³ We HOSI, ndzi twele vusiwana, languta ku xanisiwa ka mina hi lava va ndzi vengaka, ndzi tlakule u ndzi susa etinyangweni ta rifu,

¹⁴ leswaku ndzi ta tlhela ndzi yima etinyangweni ta Siyoni, ndzi byela vanhu hinkwaswo leswi ndzi ku dzuniselaka swona, ndzi tsaka hi leswi u ndzi poniseke.

¹⁵ Vamatiko va hojomerile ekheleni leri va ri celeke; ntlhamu lowu a va wu rhiyile, wu tlhele wu phasa milenge ya vona.

¹⁶ HOSI yi titivisile, hi ku avanyisa ka yona loku lulameke: Lavo homboloka va phasiwile hi swiendlo swa vona vinyi.

¹⁷ Lavo homboloka va kongoma exivandleni xa vafi, va nga vamatiko hinkwavo lava nga riki na mhaka na Xikwembu.

¹⁸ Vapfumari va nga ka va nga rivariwi minkarhi hinkwayo, ni ku tshemba ka swisiwana ku nga ka ku nga heleli makumu.

¹⁹ We HOSI, suka u yima, ku nga vi na munhu la ku kulelaka; matiko a ma te emahlweni ka wena, ma ta avanyisiwa.

²⁰ We HOSI, chavisa vamatiko, va ta tiva leswaku vo va vanhu ntsena!